ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ދިވެހިރާއްޖޭގެ ކަންކަން ރަނގަޅު ކުރުމުގެ ފުރުސަތު އަދިވެސް އެބައޮތް ކަމަށް އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި އެމްޑީޕީ ހަރުގެ ޖަލްސާގައި މޫކޭ ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ރައްޔިތުންނަށް ދޮގު ހައްދަވައިގެން ކަމަށެވެ. އަދި އެކަމުގެ ނަތީޖާ މުޅި ގައުމުން ފެންނަ ކަމަށް އޭނާ ވިދާޅުވިއެވެ.

މޫކޭ ވިދާޅުވީ މި ސަރުކާރަކީ ރައްޔިތުންނަށް އޮޅުވާލައިގެން އައި ނަހަމަވެރިކަމެއް ކަމަށާއި، މި ސަރުކާރުގެ ވަޒީރުން ވެސް މިއީ ހަލާލު ވެރިކަމެއް ކަމަށް ގަބޫލުނުކުރާ ކަމަށެވެ.

މިސަރުކާރުން ދަނީ ރައްޔިތުން ނިކަމެތިކުރަމުންކަން ފާހަގަކުރައްވައި މޫކޭ ވިދާޅުވީ މިއަދު ރައްޔިތުންނަށް ސަލާން ޖަހައިގެން ވެސް އާސަންދަ ނުލިބޭ ކަމަށާއި، ވަޒީފާގެ ބިރުވެރިކަން އުފެދިފައިވާ ކަމަށެވެ. މަސްވެރިން ކިރުވާ މަހަށް ފައިސާ ނުލިބޭ ކަމަށާއި، ރަށްރަށުގެ އައިސްޕްލާންޓްތައް ހުއްޓިފައިވާ ކަމަށް މޫކޭ ވިދާޅުވިއެވެ. އަދި ވިދާޅުވީ އަތޮޅުތެރޭގެ ތަރައްގީއަށް ކުރިއަށް ގެންދާ ހުރިހާ މަޝްރޫއުތައް ވެސް ހުއްޓުވާފައިވާ ކަމަށެވެ.

މޫކޭ ވިދާޅުވީ ފޮނި އުންމީދާއެކު ރައްޔިތުން ނުކުމެ ގައުމު ރައީސް މުއިއްޒާއި ހަވާލުކުރި ނަމަވެސް ރައްޔިތުންނަށް މިއަދު ލިބިފައިވަނީ ދޯކާއެއް ކަމަށެވެ.

މުކޭ ވިދާޅުވީ ގައުމުގެ މިދަނީ ރަނގަޅު މިސްރާބަށް ނޫން ކަމަށާއި، ގައުމު ރަނގަޅު ކުރުމުގެ ފުރުސަތު އަދިވެސް ރައީސް މުއިއްޒަށް އެބައޮތް ކަމަށެވެ. ކަންކަން ރަނގަޅުކޮށް ގައުމާގެން ކުރިއަށްދާން ޖެހޭ ކަމަށް އޭނާ ވިދާޅުވިއެވެ.

ގައުމު ހަމަ މަގަށް އެޅުވުމަށް ރައީސް މުއިއްޒު މަސައްކަތް ނުކުރައްވާ ކަމަށްވާނަމަ ގައުމު ސަލާމަތް ކުރުމަށް ރައްޔިތުން ނުކުންނާނެ ކަމަށާއި، ރައްޔިތުންނާއެކު އެމްޑީޕީން ކުރިއަށްދާނެ ކަމަށް މުކޭ ވިދާޅުވިއެވެ.