ބްރެންޓްފޯޑަށް ކުޅެމުން އައި އިންގްލެންޑުގެ ސްޓްރައިކަރ އިވާން ޓޯނޭ، ސައުދީ ޕްރޯ ލީގުގެ އަލް އަހްލީ ސައުދީ އަށް ބަދަލު ވެއްޖެ އެވެ.

އުމުރުން 28 އަހަރުގެ ކުޅުންތެރިޔާ ބްރެންޓްފޯޑަށް ބަދަލުވީ 2020 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ފަސް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގައި ބާކީ އެއް އަހަރު އޮއްވާ، އޭނާ ވަނީ އަލް އަހްލީ އަށް ބަދަލުވެފަ އެވެ. އޭނާ ހޯދުމަށް އަލް އަހްލީން ވަނީ 40 މިލިއަން ޔޫރޯ ދައްކައިފަ އެވެ.

އަލް އަހްލީ އާއެކު ޓޯނޭ ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. އަލް އަހްލީ އަކީ ޓޯނޭގެ ސީނިއާ ކެރިއަރުގައި އޭނާ ކުޅޭނެ ދިހަ ވަނަ ކުލަބެވެ.

ޓޯނޭ ވަނޯ ބްރެންޓްފޯޑުގައި މޮޅު ކުޅުމެއް ދައްކައިފަ އެވެ. އޭނާ ވަނީ އެ ކުލަބަށް ކުޅެދިން 141 މެޗުގައި 72 ލަނޑު ޖަހައިފަ އެވެ. ޓޯނޭ އަށް ވަނީ، 2023 ވަނަ އަހަރު އިންގްލެންޑުގެ ޤައުމީ ޓީމުން ވެސް ޖާގަ ލިބިފަ އެވެ. އޭނާ ވަނީ ޤައުމީ ޓީމަށް ހަ މެޗު ކުޅެދީ އެއް ލަނޑު ޖަހައިފަ އެވެ.