މާރުކޭޓް ގޮޅިތަކުގައި މަސައްކަތް ކުރާ ދިވެހިންގެ ދަށުން މަސައްކަތްކުރާނެ ބިދޭސީންނަށް ކޯޓާގެ ދަށުން ފުރުސަތު ލިބެން ޖެހޭ ކަމަށް ޤަބޫލުކުރައްވާ ކަމަށް މާލޭގެ މޭޔަރ އާދަމް އާޒިމް ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ ބިދޭސީން މާރުކޭޓްގެ ގޮޅިތަކުގައި ތިބުމަކީ ޚިޔާލުތަފާތުކަމެއް ކަމަށް އާޒިމް ވިދާޅުވިއެވެ. އެގޮތުން ބައެއް އާއްމުން އެދެނީ ބިދޭސީންނަށް ގޮޅިތަކުގައި ތިބެވޭނެ މަގު ފަހިކުރުން ކަމަށް އާޒިމް ވިދާޅުވިއެވެ. ބައެއް ވިޔަފާރިވެރިންނަކީ އުމުރުން ދުވަސްވީ މީހުންކަމަށް ވުމާއި އެކު އެ މީހުންނަށް އެހީތެރިވުމަށް ބިދޭސީން ތިބުން އެދޭ ކަމަށެވެ. ސަބަބަކީ އެ މީހުންނަށް އެހީވާން ދިވެހިން ނުލިބުމާއި މާރުކޭޓުގައި ކުރަން ޖެހޭ މަސައްކަތް އެ މީހުންނަށް އުމުރުން ދުވަސް ވުމުގެ ސަަބަބުން އެކަނި ކުރެވޭ މިންވަރު ނުވުން ކަމަށް އާޒިމް ވިދާޅުވިއެވެ. ޤާނޫނާއި ޤަވާއިދަށް ހުރުމަތްތެރިވުން ވަރަށް މުހިންމު ކަަމަށާއި 100 މީހުން ތިބެފަ ކޮންމެ މީހަކަށް ގޮތެއް ހަމަޖައްސަ ދިނުމަކީ ކުރެވޭނެ ކަމެއް ނޫން ކަމަށް އާޒިމް ވިދާޅުވިއެވެ. ނަމަވެސް ބިދޭސީން މާރުކޭޓް ގޮޅީގައި މަސައްކަތް ކުރާ ނަމަ އެކަން ކުރަން ޖެހޭނީ ޤާނޫނުގެ ތެރެއަށް ފެތޭ ގޮތަށް ކަމަށާއި އެހެން ވިޔަފާރިތަކަށް ބިދޭސީން ގެނައުމަށް ކޯޓާ ލިބޭ ފަދައިން މާރުކޭޓުގައި ވިޔަފާރިކުރާ މީހުންނަށް ވެސް އެ ފުރުސަތު އޮންނަން ވާނެ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ ރާއްޖޭގެ މަސައްކަތްތެރިން މަދުވުމުން އިގްތިސާދު ދެމެހެއްޓުމަށް ބައެއް ދާއިރާތަކަށް ބިދޭސީ މަސައްކަތްތެރިން ބޭނުންވާ ކަމަށެވެ. ނަމަވެސް އެކަން ކުރެވެން ޖެހޭނީ ޤާނޫނާއި އެއްގޮތަށް ކަމަށް އާޒިމް ވިދާޅުވިއެވެ. މާރުކޭޓްގައި ވިޔަފާރިކުރާ މީހުން ވިޔަފާރިކުރާ އިރު ލިބޭ ފައިސާ ވަންނަން ޖެހޭނީ ގޮޅި ލިބިފަ ހުރި މީހާގެ އެކައުންޓަށް ކަމަށާއި، ޓެކްސްތައް ބަރާބަރަށް ދައްކަން ޖެހޭނެ ކަމަށް އޭނާ ވިދާޅުވިއެވެ.