މިފެންނަނީ މިނިވަން މުސްތަގިއްލު ބޭންކަކަށް ރައީސުލްޖުމްހޫރިއްޔާ ސަރުކާރުގެ ޑިޕާޓްމެންޓެއްހެން އަމުރު ކުރައްވައިގެން ބޭންކް ހިންގަން އުޅޭތަންކަމަށް ދި ޑިމޮކްރަޓްސް ޕާޓީން ބުނެފިއެވެ.
އެ ޕާޓީން ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ހުޅުދޫ ދާއިރާގެ ކުރީގެ މެމްބަރު އިލްޔާސް ލަބީބު ވިދާޅުވީ، މިއަދު މިފެންނަނީ މިނިވަން މުސްތަގިއްލު ބޭންކަކަށް ރައީސުލްޖުމްހޫރިއްޔާ ސަރުކާރުގެ ޑިޕާޓްމެންޓެއްހެން އަމުރު ކުރައްވައިގެން ބޭންކް ހިންގަން އުޅޭތަން ކަމަށެވެ.
އިލްޔާސް ވިދާޅުވީ، މިދިޔަ އޭޕްރީލް މަހުން ފެށިގެން ބޭންކް އޮފް މޯލްޑިވްސް އިން ތަކުރާރުކޮށް ޑޮލަރު ނުލިބޭ ވާހަކަ ސަރުކާރާއި އެމްއެމްއޭއަށްވެސް އަންގަމުންދާ ކަމަށެވެ.
ބޭންކަށް ޑޮލަރުން އާމްދަނީ ނުލިބޭ ވާހަކަ ތަކުރާރުކޮށް އަންގަމުން ގޮސްފައިވާކަން އިލްޔާސް ފާހަގަ ކުރެއްވިއެވެ.
އެހެންނަމަވެސް ސަރުކާރުންވެސް އެމްއެމްއޭއިންވެސް އެކަމަށް އެއްވެސް އިޖާބައެއް ދީފައި ނުވާ ކަމަށާއި، އެންމެ ފަހުން ބޭންކުން އެ ނިންމުން ނިންމި ހިސާބުން ސަރުކާރުން ރައީސްގެ ހެޔޮފުޅުކަން ދެއްކެވުމަށް މަސައްކަތް ކުރެއްވީކަމަށް އޭނާ ވިދާޅުވިއެވެ.
މީ ވަރަށް ހިތާމަހުރި ކަންކަން، އަޅުގަނޑުމެންނަށް މި ފެންނަނީ މިނިވަން މުސްތަޤިއްލު ބޭންކެއް، ސަރުކާރު ހިއްސާ އެބައޮތް، ބޭންކަކަށް ރައީސުލްޖުމްހޫރިއްޔާ ސަރުކާރުގެ ޑިޕާޓްމަންޓެއް ހެން އަމުރު ކުރައްވައިގެން ބޭންކް ހިންގަން އުޅޭތަން، އޭގެ ސަބަބުން ބޭންކުގެ ކަސްޓަމަރުންގެ އިތުބާރު ބޭންކަަށް ގެއްލެނީ.ހުޅުދޫ ދާއިރާގެ ކުރީގެ މެމްބަރު އިލްޔާސް ލަބީބު
ބީއެމްއެލްއިން ރުފިޔާ ކާޑުތަކަށް ޑޮލަރު ނުދޭން ނިންމާ އެކަން އިއުލާން ކުރީ ސަރުކާރާއެކު މަޝްވަރާކުރުމަށްފަހު، މަޝްވަރާތަކާ ހިލާފަށްކަމަށް ސަރުކާރުން ވަނީ ބުނެފައެވެ.
