ފުޓްބޯޅަ އެސޯސިއޭޝަން އޮފް މޯލްޑިވްސް ނޯމަލައިޒޭޝަން ކޮމިޓީއަކާ ހަވާލު ކުރަން ނިންމައި ފަސް މެމްބަރުންގެ ކޮމިޓީގެ ޗެއާމަންކަން ކުރީގެ ކުޅިވަރާ ބެހޭ ވަޒީރު އަހުމަދު ޒުހޫރަށް ދީފި އެވެ.
ފީފާއިން މިހާރު ވަނީ މިކަން ދިވެހިރާއްޖޭގެ އެފްއޭއެމަށް އަންގައިފަ އެވެ. މި ކޮމިޓީގައި ޒުހޫރުގެ އިތުރުން ހިމެނެނީ ފަރީހާ ޝަރީފް އާއި އިސްމާއީލް ސިމާން އާއި ގާނޫނީ ވަކީލު އަހުމަދު މުއިއްޒު އާއި އަހްމަދު އަލީ އެވެ.
ފީފާއިން މިއަދު ޓިއުނީޝިޔާ އާއި ދިވެހިރާއްޖޭގެ އެފްއޭ ހިންގަން ކޮމިޓީއަކާ ހަވާލުކުރި ރާއްޖޭގެ އެފްއޭއެމުގެ ކަންކަން ހަމަޔަކަށް އަޅުވައި އައު އިންތިހާބު ބާއްވައި އައު ރައީސަކު ހޮވަން ޖެހޭ ފަހު މުއްދަތަކަށް ހަމަޖައްސާފައިވަނީ އަންނަ އަހަރުގެ ޖުލައި މަހުގެ 31 ވަނަ ދުވަހެވެ.
ޒުހޫރަކީ ކުރީގެ ރައީސް އަބަދުﷲ ޔާމީންގެ ވެރިކަމުގައި ހޯމް މިނިސްޓަރު ކަމުގެ އިތުރަށް ހެލްތް މިނިސްޓަރުކަމާއި ކުޅިވަރާ ބެހޭ ވަޒީރުކަން ވެސް ކުރެއްވި ބޭފުޅެކެވެ. އޭނާ އެންމެ ފަހުން ހުންނެވީ މި ސަރުކާރުގެ އެޗްޑީސީގެ ޗެއާމަނަކެވެ. އޭނާ މަގާމުން އިސްތިއުފާ ދެއްވީ މަގާމުގައި ފަސް މަސް ހޭދަކުރުމަށްފަހު މިދިޔަ ޖޫން މަހު އެވެ. މިވަގުތު ޒުހޫރު ހުންނެވީ އޮސްޓްރޭލިޔާގަ އެވެ.
ނޯމަލައިޒޭޝަން ކޮމިޓީ އަށް ފީފާއިން ވަނީ ވަރަށް ގިނަ ބާރުތަކެއް މަތިކޮށްފަ އެވެ. މީގެ ތެރޭގައި އެފްއޭއެމުގެ ވެރިން ހިޔާނާތްވެފައިވާ ފައިސާ ރާއްޖޭގެ ގާނޫނޫ އޮނިގަނޑުގެ ތެރެއިން އަނބުރާ ހޯދުމާއި ފީފާގެ އޮޑިޓް އަދި ކޮމްޕްލަޔަންސް ކޮމިޓީގެ ފާހަގަކޮށް އަންގާފައިވާ ކަންކަން ތަންފީޒުކުރުމާއި އެފްއޭއެމުގެ އަސާސީ ގަވާއިދު އިސްލާހުކޮށް އިންތިހާބު ބޭއްވުން ހިމެނެ އެވެ.
ފީފާއިން ނޯމަލައިޒޭޝަން އައްޔަންކުރަނީ ގިނަވަގެން އެއް އަހަރު ދުވަހަށެވެ. މި ކޮމިޓީގެ މެމްބަރުންގެ މުސާރައަކަކީ 4000 ޑޮލަރާއި 6000 ޑޮލަރާ ދެމެދެވެ. އެފްއޭއެމް ނޯމަލައިޒް ކުރަން ނިންމީ އެ އިދާރާގެ އިންތިހާބު ދެ ފަހަރު މަތިން ނުބޭއްވި ގޮސް ގާނޫނީ އަދި އެޑްމިނިސްޓްރޭޓިވް ހުސްކަމަކަށް އައުމާއި މާލީ އޮތުން އެފްއޭއެމަށް ކޮރަޕްޝަނުގެ ތުހުމަތު ކުރެވި، ފީފާއިން ދީފައިވާ 1 މިލިއަން ޑޮލަރުގެ ލޯނު ފައިސާގެ މައްސަލާގައި ރައީސް ބައްސާމް އަދީލް ޖަލީލް ސަސްޕެންޑްކުރުމާއެކުގަ އެވެ.
ކޮރަޕްޓް ވެފައިވާ ރާއްޖޭގެ ފުޓްބޯޅަ ހިންގަން ހަވާލުވާ ނޯމަލައިޒޭޝަން ކޮމިޓީ އަކީ ވަރަށް ގިނަ ބާރުތަކެއް ލިބިފައިވާ ކޮމިޓީއެކެވެ. މި ގޮތުން ފީފާއިން ވަނީ މި ކޮމިޓީގެ މެމްބަރުންނަށް މައިގަނޑު ގޮތެއްގައި ހަ ކަމެއް މަތިކުރަން ނިންމައިފަ އެވެ. އެއީ:
- ފީފާ އަދި އޭއެފްސީން ދީފައިވާ ފައިސާ އަށް ޚިޔާނާތްތެރިވެފައިވާނަމަ އެ ފައިސާ ރާއްޖޭގެ ގާނޫނީ އޮނިގަނޑުގެ ތެރެއިން ހޯދުން
- އެފްއޭއެމުގެ އަސާސީ ގަވައިދާއި އިލެކްޓޯރަލް ކޯޑު އިސްލާހު ކުރުން
- ދަރަނި ރީސްޓްރަކްޗާ ކުރުން
- ފީފާއިން އައްޔަންކޮށްފައިވާ މާލީ ކޮންސަލްޓަންޓާ ގުޅިގެން ކަންކަން އިންތިޒާމް ކުރުމާއި ފީފާގެ ފޮރެންސިކް އޮޑިޓް ރިޕޯޓްގައި ބަޔާންކޮށްފައިވާ ކަންކަން ތަންފީޒު ކުރުން
- އެފްއޭއެމުގެ އައު އިންތިހާބު ބޭއްވުން
- މުބާރާތްތައް ބާއްވައި އެފްއޭއެމް ދުވަހުން ދުވަހަށް ހިންގުމަށް ކުރަންޖެހޭ އެންމެހާ ކަންކަން ކުރުން
މިއީ ފީފާއިން ރާއްޖޭގެ ފުޓްބޯޅަ އެސޯސިއޭޝަން ނޯމަލައިޒްކުރި ދެ ވަނަ ފަހަރެވެ. މީގެ ކުރިން ކުރީ 2014 ވަނަ އަހަރު އެވެ.
