ބުރްކިނާ ފާސޯގެ ވެރިރަށް ކުއާގަދޫގޫ މެދުތެރޭގައި ދިން "ޓެރެރިސްޓް ހަމަލާ" އެއްގައި 17 މީހުން މަރުވެ އަށް މީހުން ޒަޚަމް ވެއްޖެ ކަމަށް އެ ގައުމުގެ ސަރުކާރުން ބުނެފިއެވެ.
މަންޒަރު ދުށް މީހުންނާ ހަވާލާދީ ރިޕޯޓްކޮށްފައިވާގޮތުގައި ބަޑިހިފައިގެން ތިބި ތިން މީހަކުވަނީ ހޮޓެލް އެއް އަދި ރެސްޓޯރަންޓެއްގެ ބޭރުގައި ތިބި ބަޔަކަށް ބަޑިން ހަމަލާ ދީފައެވެ.
ސިޓީގެ މެދުތެރެ އަސްކަރިއްޔާއިން މިހާރު ބަންދުކޮށްފައިވާއިރު ކުއާގަދޫގޫ ހުންނަ އެމެރިކާ އެމްބަސީއިންވަނީ އެ ގައުމުގެ ރައްޔިތުން އެ ސަރަހައްދަށް ނުދިއުމަށް އިލްތިމާސް ކޮށްފައެވެ.
މި ހަމަލާ ފެށިގެން ދިޔައީ އާދީއްތަ ދުވަހުގެ ރޭ ނުވައެއް ޖެހިތާ އިރުކޮޅެއްގެ ތެރޭގައި ކުއާގަދޫގޫގެ ކާރުބާރު ބޮޑު ކްވާމީ އެންރުމާ އެވެނިއުގައެވެ.
ދެ ތަނެއްގައި ދެވުނު މި ހަމަމަލާތަކުގެ ތެރެއިން އެއް ހަމަލާ ދީފައިވަނީ ހޮޓެލް ބްރާވިއާ އަދި އަޒީޒް އިސްތަންބޫލް ރެސްޓައުރަންޓްގައެވެ.
މަރުވެފައިވަނީ ކޮން ގައުމުތަކެއްގެ ބައެއްކަން ކަށަވަރު ނުވި ނަމަވެސް މަރުވި މީހުންގެ ތެރެއިން އެކަކީ ތުރުކީގެ ރައްޔިތެއްކަން އެ ސިޓީގެ ހޮސްޕިޓަލުން ވަނީ ބުނެފައެވެ.
އިސްލާމީ ހަނގުރާމަވެރިންގެ ނަމުގައި އުޅޭ ހަނގުރާމަވެރިންތަކެއް ކެފޭ އެއްގެ ކައިރީގައި މިދިޔަ އަހަރު ޖެނުއަރީގައި ދިން ހަމަލާއެއްގައި 30 މީހުން ވަނީ މަރުވެފައެވެ.
