ގއ. ކޮލަމާފުށިން ގާތްގަނޑަކަށް 2 ކިލޯ ހުރި މާވަހު ކަމަށް ބެލޭ އެއްޗެހިތަކެއް ހޮވައިފިއެވެ.

މި ނޫހަށް މައުލޫމާތު ދެއްވަމުން އެރަށުގެ ކައުންސިލްގެ ރައީސް އިބްރާހިމް ވަހީދު ވިދާޅުވީ މާވަހަރު ކަމަށް ބެލޭ އެއްޗެހިތަކެއް ގޮނޑުދޮށުން ހޮވާފައިވާ ކަމަށާއި، އެއީ އަސްލު މާވަރުތަކެއްތޯ ބެލުމަށް މަސައްކަތް ކުރަމުންދާ ކަމަށެވެ.

ވަހީދު ވިދާޅުވީ މިތަކެތި ހޮވާފައިވަނީ އެރަށުގެ ފުއްޓަރު ފަރާތުން ކަމަށާއި، އޭގެ ތެރޭގައި މާވަހަރު ކަމަށް ބެލެވޭ ބޮޑު ދެ އެއްޗެއް އަދި ކުދި އެއްޗެހިތަކެއް ހޮވާފައިވާ ކަމަށެވެ. ގާތްގަނޑަކަށް ދެ ކިލޯ ހުންނާނެ ކަމަށް އޭނާ ވިދާޅުވިއެވެ.

މި ތަކެތި ހޮވާފައިވަނީ އެރަށުގެ ތިން މީހުންނެވެ.

ދޭތެރެ ދޭތެރެއިން ރާއްޖޭގެ ގޮޑުދޮށްތަކުން މާވަރުތައް މީހުން ހޮވައެވެ.

މާވަހަރަކީ ބޮޑުމަހުގެ ފަރާތުން ލިބޭ އެއްޗެކެވެ. އެއީ ސްޕާމް ވޭލް ނަމަކަށް ކިޔާ ބާވަތުން ލިބޭ އެއްޗެކެވެ. ދުނިޔޭގެ ބާޒާރުގައި އަގުބޮޑުކޮށް ވިކޭ މާވަހަރަކީ އާއްމު ގޮތެއްގައި ސެންޓު އުފެއްދުމަށް ބޭނުންކުރާ އެއްޗެކެވެ.