ރައްޔިތުންގެ މަޖިލީހުގައި މޭލެ ސިޓީ ތަމްސީލުކުރާ 13 މެމްބަރުންނަކީ ގޮނޑި ހޫނު ކުރަން ތިބި މެމްބަރުންތަކެއް ކަމަށާއި އެއީ ބޭކާރު ބައެއް ކަމަށް ބުނެ، ގޯއްޗާއި ފްލެޓް ނުދީ ލަސްވާ މައްސަލާގައި އަޑު އުފުލަމުންދާ އާންމުން ހުކުރު ދުވަހުގެ ރޭ މުޒާހަރާ ކޮށްފި އެވެ.

ގޯއްޗާއި ފްލެޓް ނުދީ ލަސްވަމުންދާތީ އެކަމުގައި އަޑު އުފުލަމުންދާ ފަރާތްތަކުން ރާޅުގަނޑު ސަރަހައްދުގައި ބޭއްވި މުޒާހަރާ އަކީ ސިލްސިލާކޮށް ކޮންމެ ހުކުރު ދުވަހެއްގެ ރޭ ކުރަމުން އަންނަ މުޒާހަރާއެކެވެ.

ފްލެޓާއި ގޯތީގެ މައްސަލާގައި ސަރުކާރުން އަމަލުކުރަމުންދާ ގޮތުން އެކަމާ ހިތްހަމަ ނުޖެހުން ފާޅުކޮށް، އެކި ފަހަރު މަތިން މުޒާހަރާ ކުރަމުންދާ އާންމުން ވަނީ ހައުސިންގ މިނިސްޓްރީއަށާއި، ކަމާ ގުޅުން ހުރި އެކި އިދާރާތަކަށް ގޮސް އެކަމުގެ ކަންބޮޑުވުން ހިއްސާކޮށްފައެވެ.

ހުކުރު ދުވަހުގެ ރޭ ބޭއްވި މުޒާހަރާގައި އާއްމުން ބުނެފައިވަނީ، މަޖިލީހުގައި މާލެ ސަރަހައްދު ތަމްސީލުކުރަން ހޮއްވަވާފައި ތިބި 13 މެމްބަރުންނަކީ ގޮނޑި ހޫނު ކުރަން ތިބި ބައެއް ކަމަށެވެ. އަދި އެ މެމްބަރުންނަށް ގޮވާލަނީ ގެއަށް ދިއުމަށް ކަމަށެވެ.

މުޒާހަރާގެ އެހެން ބައިވެރިއަކު ބުނީ މާލޭގެ ރައްޔިތުންނަށް ހޯދައިދޭން ވައުދުވި ގޯތިތަކުގެ މައްސަލައިގައި އެ މެމްބަރުން ދެނީ ބީރު ކަންފަތެއް ކަމަށެވެ.

މުޒާހަރާގެ ބައިވެރިން ވަނީ މި 13 މެމްބަރުން ވަގުތުން އިސްތިއުފާ ދިނުމަށް ވެސް ގޮވާލާފައެވެ. އަދި ވީ ވައުދާ އެއްގޮތަށް ގޯއްޗާއި ފްލެޓް ހަވާލުކުރުމަށް ވެސް ވަނީ ގޮވާލާފައެވެ.

ރައީސް އިބްރާހިމް މުޙައްމަދު ސާލިޙްގެ ސަރުކާރުން ދިން ގޯއްޗާއި ފްލެޓް ހަވާލުކުރުން ލަސްވަމުންދާތީ އެކަމުގެ ކަންބޮޑުވުން ފާޅުކޮށް ސިލްސިލާކޮށް ކުރަމުންދާ މުޒާހަރާތަކުގައި ބައިވެރިން ވަނީ އެކި ކަހަލަ ލިޔުންތައް ލިޔެފައިވާ ޕޯސްޓަރުތަކުގައި ޝުއޫރު ފާޅުކޮށްފައެވެ. އެގޮތުން ގިރާވަރު ފަޅާއި ގުޅީ ފަޅު ހިއްކުމަށް ގޮވާލާފައިވާއިރު، ހައްޤުވެރިންނަށް ފްލެޓްތައް އަވަހަށް ހަވާލު ކުރުމަށް ވެސް ވަނީ ގޮވާލާފައިވެއެވެ.

މީގެ އިތުރުން ރައްޔިތުންގެ ވޯޓުގެ ނާޖާއިޒު ފައިދާ ނުނެގުމަށާއި، ރައީސް މުޢިއްޒު ކެމްޕެއިން ތެރޭގައި ދެއްކެވި ވާހަކަތަކަށް އިޚްތިރާމް ކުރެއްވުމަށް ވެސް ގޮވާލާފައިވެ އެވެ.

ރިޔާސީ އިންތިޚާބުގެ ކެމްޕެއިން ތެރޭގައި މިހާރުގެ ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެފައިވަނީ، ގޯހުން ވިޔަސް ފެއިލްވެފައިވާ ސިޔާސަތެއްގެ ދަށުން ވިޔަސް ރައްޔިތަކަށް ދީފައިވާ ފްލެޓަކަށްވެސް ގޯއްޗަކަށް ވެސް އެމަނިކުފާނުގެ ވެރިކަމެއްގައި ހުރަސް ނާޅުއްވާނެ ކަމަށެވެ.

ނަމަވެސް 2024 ޖުލައި 29 ގައި ބޭއްވި ޕެޓިޝަން ކޮމިޓީގައި މިނިސްޓަރު ހައިދަރު ދެއްކެވި ވާހަކަތައް ބައްޓަން ކޮށްފައިވަނީ މުޅިން އެހެން މިސްރާބަކަށެވެ. ހައިދަރު ވިދާޅުވީ ރައީސުލްޖުމްހޫރިއްޔާ "އަހާ" ޕްރޮގްރާމްގައި ފްލެޓާ ބެހޭ ގޮތުން ވިދާޅުވި ގޮތަށް އެއްވެސް ކަހަލަ އޮޅުވާލުމެއް ނެތް ނަމަ، ފްލެޓުތައް ދެއްވާނެ ކަމަށެވެ.

ދައުލަތުން ލިޔުން ދީފައި އޮތް އެއްވެސް މީހެއްގެ އަތުން ފްލެޓް އަތު ނުލައްވާނެ ކަމަށް ރިޔާސީ އިންތިޚާބުގައި ރައީސް މުއިއްޒު ވިދާޅުވި ވިދާޅުމަށް މިނިސްޓަރ ހައިދަރު މާ ބޮޑު ސަމާލުކަން ނުދެއްވައެވެ.