އިސްލާހީ މަސައްކަތުގައި އިސްކޮށް އުޅުއްވި މުޙައްމަދު ޒާހިރު (އޯކޭ ޒާހިރު) ނިޔާވެއްޖެ އެވެ.

އުމުރުން 76 އަހަރުގައި އޯކޭ ޒާހިރު ނިޔާވެފައި ވަނީ އަވަށްޓެރި ސްރީ ލަންކާގަ އެވެ. ނިޔާވިއިރު، އޯކޭ ޒާހިރު ގެންދެވީ ލަންކާގެ އާސިރީ ހޮސްޕިޓަލު ގައި ފަރުވާ ހޯއްދަވަމުންނެވެ. އޯކޭ ޒާހިރު ދިރިއުޅެމުން އައީ ވެސް ލަންކާގަ އެވެ.

އޯކޭ ޒާހިރު އަކީ ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ފޮނަދޫ ދާއިރާގެ، ލ.ދާއިރާ ރައީސްކަން ވެސް އަދާ ކޮށްފައިވާ ފަރާތެކެވެ. މީގެ އިތުރުން 2008 ވަނަ އަހަރު ކުރީގެ ރައީސް މުޙައްމަދު ނަޝީދުގެ ވެރިކަމުގައި އޯކޭ ޒާހިރު ވަނީ ތިލަފުށީ ކޯޕަރޭޝަންގެ ޗީފް އެގްޒެކެޓިވް އޮފިސަރުކަން ކޮށްފަ އެވެ.

އޯކޭ ޒާހިރު އަކީ ކުރިން ވިޔަފާރީގައި އުޅުއްވި ފާހަގަކޮށްލެވޭ ބޭފުޅެކެވެ. އޯކޭ ޒާހިރު އަށް ވަނީ ދަރުލަތުން ދެމުން އަންނަ ހިތްވަރު ދިނުމުގެ ޤައުމީ އިނާމު 1993 ވަނަ އަހަރު ލިބިފަ އެވެ.