މާލޭ ސަރަހައްދުގެ ނުވަ ސަރަހައްދެއްގައި ޕާކް ކުރާ އުޅަނދުތައް، މެދު ނުކެނޑި ޓޯ ކުރުމަށް ނިންމާފައިވާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާނު ވިދާޅުވެއްޖެއެވެ.

މީޑިއާތަކަށް މިނިސްޓަރ ވިދާޅުވީ ވެހިކަލްތައް ޓޯކުރާނެ 9 ސަރަހައްދެއް ކަނޑައަޅާފައިވާ ކަމަށެވެ. އޭގެ ތެރޭގައި ސްކޫލްތައް ކައިރި ސަރަހައްދުތަކާއި، މިސްކިތްތައް ކައިރި ސަރަހައްދުތަކާއި، އާއްމުން އާއްމުކޮށް ވަދެ ނުކުމެ އުޅޭ ސަރަހައްދުތައް ހިމެނޭ ކަަމަށް އިހުސާން ވިދާޅުވިއެވެ. މީގެ އިތުރުން އެހެން ޒޯންތަކަށް ރެޖިސްޓްރީކޮށްފައިވާ ޒޯންތަކާއި، ރަސްމީ ރަޖިސްޓްރޭޝަނެއް ނެތް އުޅަނދުތައް ޓޯކުރެވިފަ ހުރި ކަަމަށް ވެސް އިހުސާން ވިދާޅުވިއެވެ. އެފަދަ އުޅަނދުތައް ޤަވައިދަށް ފެއްތުމަށް 40 ދުވަސް ދޭނެ ކަމަށާއި، އޭގެ ފަހުން މަގުތަކުގައި ނުގަވައިދަށް ހުންނަ ވެހިކަލްތައް އަނެއްކާ ވެސް ޓޯ ކުރަމުން ގެންދާނެ ކަމަށެވެ.

މާލެ ސަރަހައްދުގައި ނުގަވައިދުން ހުރި އުޅަނދުތައް ޓޯ ކުރުމުގެ ބަދަލުގައި ހުޅުމާލެއިން ކަނޑައަޅާ ވަކި ބިމަކަށް އެ އުޅަނދުތައް ބަދަލު ކުރުމަށް ނިންމާ ޓްރާންސްޕޯޓް މިނިސްޓްރީން ވަނީ އެކަން އިޢުލާންކޮށްފައެވެ. އެކަމާއި ގުޅޭ ގޮތުން ބުރާސްފަތި ދުވަހު ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވީ، ނުގަވައިދުން ހުރި އުޅަނދުތައް ޓޯ ނުކޮށް، އެ އުޅަނދުތައް ހުޅުމާލޭން ބިމަކަށް ގެންދިޔުމަށް 40 ދުވަހުގެ މުއްދަތެއް ދޭނެ ކަމަށެވެ. އެ ބިމަށް ވެހިކަލް ގެންދަން ޖެހޭނީ ވެހިކަލްގެ ވެރިފަރާތުންކަމަށާއި، އެކަމުގެ ސަބަބުން ޓޯކޮށްގެން އަރާ ޖޫރިމަނާއާއި ގެއްލުމެއް ނުލިބޭނެ ކަމަށް އޭނާ ވިދާޅުވިއެވެ.