ރާއްޖެއަށް މިހާރު ކުރަމުންދާ ވިއްސާރައިގައި ކުރިމަތިވަމުންދާ ކަންކަން މޮނިޓަރކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޚާއްސަ ޓާސްކް ފޯސްއެއް އުފައްދަވައިފިއެވެ.

ވިއްސާރައާއި ގުޅޭ ކަންކަން މޮނިޓަރކުރުމަށް އެކުލަވާލި ކޮމިޓީގައި ހިމެނެނީ ސަރުކާރުގެ ވަޒީރުންނާއި ސަލާމަތީ ޚިދުމަތްތަކުގެ އިސް ވެރިންނެވެ.

ރައީސް އޮފީހުން ބުނީ އެ ޓާސްކް ފޯސްގެ ބޭނުމަކީ މިހާރުކުރަމުންދާ ވިއްސާރައާއި ގުޅިގެން ޢާއްމު ރައްޔިތުންގެ ދިރިއުޅުމުގެ ޙާލަތަށް ބުރޫ އަރާފައިވާތީ ވިއްސާރަ އާއި ގުޅިގެން ރައްޔިތުންނަށް ކުރިމަތިވާ ކަންކަމަށް އަވަސް ޙައްލު ހޯދައިދިނުން ކަމަށެވެ. މި ޓާސްކްފޯސް ޗެއަރ ކުރައްވާފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ.

ރާއްޖެއަށް މިހާރު ކުރަމުންދާ ވިއްސާރާގައި 20 ރަށަކަށް ގެއްލުން ލިބިފައިވާ ކަމަށާއި، މާލޭގެ 200 އަށްވުރެ ގިނަ ގެއެއްގައި ފެންބޮޑުވެފައިވާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) އިން ވަނީ ބުނެފައެވެ.