ނޭޕާލަށް ބޯކޮށް ވާރޭވެހި ބިންގަނޑުކަނޑައިގެން ދިޔުމުގެ ހާދިސާތަކުގައި ވޭތުވެދިޔަ ދެތިން ދުވަސް ތެރޭ މަދުވެގެން 30 މީހަކު މަރުވެފައިވާ ކަމަށް އޮފިޝަލުން ބުނެފިއެވެ.
މިހާދިސާތަކާއި ގުޅިގެން 10 މީހަކު ގެއްލިފައިވާއިރު ނޭޕާލްގެ ބޮޑު ސަރަހައްދެއްގައި ފެންބޮޑުވެފައިވާ ކަމަށް ރިޕޯޓުތައް ބުނެއެވެ.
މީހުން ސަލާމަތް ކުރުމުގެ މަސައްކަތުގައި ފުލުހުންނާއި، ސިފައިންނާއި އަދި އާންމުން ދަނީ ހަރަކާތްތެރި ވަމުންނެވެ.
ނޭޕާލަށް ޖޫން އިން ފެށިގެން ސެޕްޓެމްބަރު މަހާ ހަމައަށް ކުރާ މޫސުމީ ވިއްސާރަ އަކީ ދަނޑުގޮވާން ކުރުމަށް ބަރޯސާވާ ނޭޕާލަށް މުހިންމު ވިއްސާރައެކެވެ. އެހެންނަމަވެސް ކޮންމެ އަހަރަކުވެސް ވިއްސާރައިގެ ސަބަބުން ނޭޕާލަށް ބޮޑެތި ގެއްލުން ލިބެއެވެ.
