ސައިބަރކުށްތައް ތަހުގީގުކޮށް ދައުވާކުރުމުގައި އަމަލުކުރާނެ އިޖުރާއީ އުސޫލުތައް ކަނޑައެޅުމަށްޓަކާ މަޖިލީހަށް ހުށަހަޅާފައިވާ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) އަށް އިޞްލާޙު ގެނައުމުގެ ބިލު މަޖިލީހުން ބަލައިގަނެފިއެވެ.

ސަރުކާރުގެ ފަރާތުން މަނަދޫ ދާއިރާގެ މެމްބަރު ހުސްނީ މުބާރަކް ހުށަހަޅުއްވާފައިވާ އެ ބިލް މަޖިލީހަސް ބަލައިގަތީ އަންގާރަ ދުވަހު ވޯޓުގައި ބައިވެރިވި 72 މެމްބަވަރުންގެ ވޯޓާއި އެކުގައެވެ. އެ ބިލް މަޖިލީހަށް ބަލައިގަތުމަށް ބޭނުންވަނީ 37 މެމްބަރުންގެ ވޯޓެވެ. އެ ބިލް މަޖިލީހަަށް ބަލައިގަނެ ދިރާސާކުރުމަށް ފޮނުވާފައި ވަނީ ޖުޑީޝަރީ ކޮމިޓީއަށެވެ.

ބިލްގެ އިބްތިދާއީ ބަހުސް މަރުހަލާގައި މެމްބަރުން ވަނީ ބިލާއި ގުޅޭގޮތުން ތަފާތު ޚިޔާލުތައް ހިއްސާކޮށްފައެވެ. އަދި ހުރިހާ މެމްބަރުންވެސް ސައިބަރކުށްތައް ހުއްޓުވުމަށް އެކަށީގެންވާ މަސައްކަތްތަކެއް ކުރުމާއި، އެ ފަދަ ކުރާ ކުށްތައް ކުރާ މީހުންނާއި މެދު އެކަށީގެންވާ ފިޔަވަޅުތަކެއް އަޅަން ޖެހޭ ކަމަށް ޤަބޫލުކުރާ ކަމަށް ފާހަގަކުރެވެއެވެ.

އެ ބިލް ހުށަހަޅާ ސަބަބެއްގެ ގޮތުގައި ބުނެފައި ވަނީ ސައިބަރސްޕޭސްގައި ކުރާ ކުށްތައް ރާއްޖޭގައި އިތުރުވުމާއި، އެފަދަ ކުށްތައް ކުރާ މީހުން ކުށް ހިންގާ ގޮތް، ޓެކްނޮލޮޖީގެ ވަސީލަތްތައް ބޭނުންކުރަމުން ފުޅާކުރަމުންދާތީ، އެފަދަ ސައިބަރ ކްރައިމް އާއި އެ ނޫންވެސް ކޮމްޕިއުޓަރ ސިސްޓަމް އާއި އެހެނިހެން އިލެކްޓްރޯނިކް ހެކި އެކުލެވޭ ކުށްތައް ހުއްޓުވުމަށް ޤާނޫނީ ބާރުވެރިކަން ހޯދާދިނުމެވެ. އަދި އެފަދަ ކުށްތައް ތަހުގީގުކޮށް ދައުވާކުރުމަށް ތަންފީޒީ އިދާރާތަކަށް ލިބެންޖެހޭ ބާރު ހޯދާދީ އެފަދަ ކުށްތައް ތަހުގީގުކޮށް ދައުވާ އުފުލުމުގައި އަމަލުކުރާނެ އިޖުރާއީ އުސޫލެއް ކަނޑައެޅުމަކީ މި ބިލުގެ މަޤްސަދެއް ކަމަށް ވަނީ ބުނެފައެވެ. އަދި ޤާނޫނަށް ގެންނަން ޖެހޭ އިސްލާހުތައް ގެނައުމުގެ އިތުރުން ބައެއް އިޖުރާއަތުތައް ޤާނޫނަށް އިތުރުކުރަން ވަނީ ހުށަހަޅާފައެވެ. އޭގެ ތެރޭގައި ހިމެނޭ ކަންތައް ތިރީގައި މިވަނީއެވެ.