އިނގިރޭސި ވިލާތުގައި ބުރާސްފަތި ދުވަހު އޮތް އެ ގައުމުގެ އާންމު އިންތިޚާބު ލޭބަރ ޕާޓީން ކާމިޔާބުކޮށް އެ ގައުމުގެ ބޮޑު ވަޒީރުގެ މަގާމު ކެއި ސްޓާމާ ޔަގީން ކުރައްވައިފިއެވެ.
އަދި އިންތިޚާބުގެ ފުރިހަމަ ނަތީޖާ އިއުލާން ކޮށްފައި ނުވި ނަމަވެސް މިހާތަނަށް އިއުލާން ކޮށްފައިވާ ނަތީޖާ އަށް ބަލާއިރު ގާނޫނު ހަދާ މަޖިލީހުގެ 650 ގޮނޑީގެ ތެރެއިން 326 ގޮނޑި ލޭބަރ ޕާޓީ އަށް ޔަގީންވެ، އިނގިރޭސި ވިލާތުގެ ދެން އަންނަ ސަރުކާރަކީ ލޭބަރ ޕާޓީގެ ސަރުކާރެއްކަން މިހާރު ވަނީ ކަށަވަރު ވެފައެވެ.
އިންތިޚާބުން ބަލިވިކަން ކޮންޒަވެޓިވް ޕާޓީގެ މިހާރު ހުންނެވި ބޮޑު ވަޒީރު ރިޝީ ސުނާކް ވަނީ އިއުލާން ކުރައްވާފައެވެ.
އިންތިޚާބުގައި ބޮޑު ނާކާމިޔާބަކާ ކުރިމަތިލެއްވި ރިޝީ ސުނާކް ހުކުރު ދުވަހުގެ ވަގުތެއްގައި ބޮޑުވަޒީރު ކަމުގެ މަގާމުން އިސްތިއުފާ ދެއްވާނެ ކަމަށް ވެސް ޚަބަރުތައް ބުނެއެވެ.
އިންތިޚާބީ ބޮޑު ވަޒީރަށް ރާއްޖޭގެ ރައީސް ޑރ. މުއިއްޒު ވަނީ މަރުހަބާ ވިދާޅުވެ އެކްސް ގައި މެސެޖެއް ޕޯސްޓް ކުރައްވާފައެވެ.
