ހަނގުރާމައިގެ ހުރިހާ މަގްސަދެއް ހާސިލް ވަންދެން އިޒްރޭލުން ފަލަސްތީނުގައި ކުރަމުންދާ ހަނގުރާމަ ހުއްޓާނުލާނެ ކަމަށާއި، ހަމާސް މުޅިން ނައްތާލެވެންދެން ހަނގުރާމަ ކުރިއަށްދާނެ ކަމަށް އިޒްރޭލްގެ ބޮޑު ވަޒީރު ނަތަންޔާހޫ އާދިއްތަ ދުވަހު ވިދާޅުވެއްޖެއެވެ.
ހަފްތާގެ ކެބިނެޓް ބައްދަލުވުން ފައްޓަވަމުން ނަތަންޔާހޫ ވިދާޅުވީ، އިޒްރޭލުން ކުރާ ހަނގުރާމައިގެ މަގްސަދު ތަކުގެ ތެރޭގައި ގާޒާގައި ހައްޔަރު ކޮށްފައި ތިބި އިޒްރޭލުގެ އަސީރުން މިނިވަން ކުރުމާއި، ގާޒާގެ ތެރެއިން އިޒްރޭލުގެ ސަލާމަތައް ހުރި ހުރިހާ ނުރައްކަލެއް ނައްތާލުން ހިމެނޭ ކަމަށެވެ.
"މި ކަމަށް ޝައްކު ކުރާ އެއްވެސް ފަރާތެއް ހުރިނަމަ ބުނަން، ކާމިޔާބުގެ ބަދަލުގައި ހޯދާނެ އެހެން އެއްޗެއް ނޯންނާނެ، ހުރިހާ މަގްސަދެއް ހާސިލް ނުވަނީސް ހަނގުރާމަ އެއް ނުނިންމާނަން." ނަތަންޔާހޫ ވިދާޅުވިއެވެ.
ޔަހޫދީ ދައުލަތުން ފަލަސްތީނުގެ ގާޒާގެ ރައްޔިތުންނަށް ހުސްވި އަހަރުގެ އޮކްޓޯބަހުގެ 7 ވަނަ ދުވަހުން ފެށިގެން ދެމުންދާ ލާ އިންސާނީ އަނިޔާ ތަކުގައި މިހާތަނަށް ފަލަސްތީނުގެ 37،000ށް ވުރެ ގިނަ މީހުން މަރުވެފައިވާ ކަމަށް ގާޒާގެ ސިއްހަތާ ބެހޭ ވުޒާރާ ގެ ތަފާސް ހިސާބުން ހާމަވެއެވެ.
