އަންގާރަ ދުވަހުގެ ޖަލްސާގައި މި ކުއްލި މައްސަލަ ހުށަހެޅުއްވީ މަރަދޫ ދާއިރާގެ މެމްބަރު އަހުމަދު ދީދީއެވެ.
އެއީ ސަރުކާރު ކުންފުނި މިފްކޯއިން މަސްވެރިން އަތުން މަސް ގަތުމަށްފަހު ފައިސާ ނުދީ ލަސްވުމާއި ގުޅިގެން މަސްވެރިން ކުރަމުންދާ އިހުތިޖާޖަށް ސަރުކާރުން އެކަށީގެންވާ ހައްލެއް ހޯދައިދެވިފައި ނުވާ ކަމަށް ބުނެ، އެކަން ޙައްލުކޮށްދިނުމަށް އެދި ސަރުކާރަށް ގޮވާލާ ހުށަހެޅި މައްސަލައެކެވެ.
ކުއްލި މައްސަލަ ހުށަހަޅުއްވަމުން މެމްބަރު ވިދާޅުވީ، މަސްވެރިން އަތުން ގަންނަ މަހަށް 48 ގަޑިއިރުގެ ތެރޭގައި ފައިސާ ދޫކުރުމަކީ ރައީސް ޑރ މުޙައްމަދު މުއިއްޒުގެ ވައުދުފުޅެއް ކަމަށެވެ. ނަމަވެސް މަސްވެރިންނަށް ފައިސާ ނުދޭތީ މިއަދު މަސްވެރިން ޙާލުގައި ޖެހިފައި ތިބިކަން މެމްބަރު ފާހަގަ ކުރެއްވިއެވެ.
އެއީ ރައީސްގެ ރިޔާސީ ވައުދުފުޅެއް، ނަމަވެސް ފާއިތުވި ދެމަސް ދުވަހު މަސްވެރިންނަށް ސަރުކާރުން ދޭންޖެހޭ ފައިސާ ދީފައެއް ނުވޭ، އޭގެ ސަބަބުން މަސްވެރިން ތިބީ ބިކަވެ، ހާލުގައި ޖެހިފައި، ދަރަނި ބިލުތަކާއި، ޔުޓިލިޓީ އަދި އެހެނިހެން ބިލުތައް ދެއްކޭނެ ގޮތެއް ނެތިފައިމަރަދޫ ދާއިރާގެ މެމްބަރު އަހުމަދު ދީދީ
މެމްބަރު ވިދާޅުވީ، ރައީސްގެ ވައުދުފުޅު ފުއްދަވައި ނުދެއްވާތީ އައްޑޫސިޓީގެ 400އެއްހާ އާއިލާ ހިމެނޭ ގޮތަށް މަސްވެރިން އިހުތިޖާޖު ކުރަމުންދާ ކަމަށާއި، އެކަމަށް ހުރަސް ނާޅައި، މަސްވެރިންނަށް ފައިސާ ދިނުން އަވަސް ކުރަން ޖެހޭ ކަމަށެވެ.
