ޝިފާން ބުނުއްވަނީ ކުށްކުރުން އިތުރުވީ ކުރީ ސަރުކާރުން ކުށްވެރިންތަކެއް ދޫކޮށްލުމުން ކަމަށެވެ. އާއްމުން އަހަނީ މި ސަރުކާރުން މަޖިލީސް އިންތިޚާބަށް ދޫކޮށްލި ބޮޑެތި ކުށްވެރިންގެ އަދަދު ޝިފާން ހާމަ ނުކުރެއްވީ ކީއްވެތޯ؟

މާލޭގައި ވައްކަމާއި، ހުޅުޖެހުމާއި، ފޭރުމާއި، މަސްތުވާތެކެތި ވިއްކުމާއި، ބޭނުން ކުރުމާއި މިހެން ގޮސް އެތައް ބާވަތެއްގެ ކުށްކުރުން އިންތިހާ އަށް އިތުރުވެފައިވާ ކަން އަންނަނީ ފާހަގަ ކުރެވެމުންނެވެ.

މާލޭގައި ކުށްކުރުން އިތުރުވެ، އެކަމުގެ ނުތަނަވަސް ކަން އާއްމުންގެ ތެރޭގައިވެސް ވަނީ ބޮޑުވެފައެވެ.

ރައްޔިތުންނަށް އަމާން ވެއްޓެއް ކަށަވަރު ކޮށްދީ މީހުންގެ މުދަލާ ގޯތި ގެދޮރުގެ ރައްކާތެރިކަން ކަށަވަރު ކުރުމުގެ އެންމެ ބޮޑު ޒިންމާ އެއް މަތިވެފައިވަނީ ދިވެހި ފުލުހުންގެ ޚިދުމަތަށެވެ.

ކުށްކުރުމުގެ މައްސަލަ ކަންބޮޑުވާ މިންވަރަކަށް އިތުރުވެ އެ ވާހަކަތައް ނޫސްތަކުގައި ލިޔެ، ސޯޝަލް މީޑިއާގައި އެކަމުގެ އުނދަގުލުގެ ކަންބޮޑުވުން އާއްމުން ފާޅު ކުރަން ފެށުމުން، ފުލުހުންގެ އެންމެ މަތީ ވެރިންގެ ލެވެލް އިން އެސިސްޓެންޓް ކޮމިޝަނަރ އޮފް ޕޮލިސް އަހްމަދު ޝިފާން ދެއްކެވި ސަބަބަކީ ކުރުކޮށް ދަންނަވާނަމަ "ކުރީ ސަރުކާރެވެ."

ޝިފާން "އެކްސް" ގައި ވިދާޅުވީ، މާލޭގައި ކުށްކުރުން އިތުރުވެފައި ވަނީ މީގެ 10 މަސް ދުވަސް ކުރިން 434 ކުށްވެރިން މުޖުތަމަޢުއަށް ދޫކޮށްލުމުން ކަމަށެވެ.

މިހާރު އޮތް ސަރުކާރަށް އަދި 10 މަސް ދުވަސް ފުރިހަމަ ނުވާތީ، އެހެން ވީމާ އެކަން ގޮސް އެ އެޅެނީ ކުރީ ސަރުކާރުގެ ބޮލުގައެވެ.

ޝިފާން ވިދާޅުވީ، ކުށްވެރިން ދޫކޮށްލީ އެ މީހުންގެ ކަންކަން ބެލެހެއްޓޭނެ ހަރުދަނާ ނިޒާމެއް ނެތި ކަމަށެވެ. އަދި ފުލުހުންގެ އިންފްރާސްޓްރަކްޗަރ ތަރައްޤީކުރުމަށް ކުރިން ރޭވުންތެރި ކަމާ އެކު މަސައްކަތްތައް ކުރެވިފައި ނެތުމުގެ ސަބަބުން ކަމަށެވެ.

ކުށްވެރިން ހައްޔަރު ކުރުމާއި، އިންސާފުގެ ކުރިމައްޗަށް ގެނައުމާއި، ކުށްކުރުން މަދުކުރުމަށް ބޭނުންވާ ރޭވުން ތެރިކަމާއި، ފުލުހުންގެ އިންފްރާސްޓްރަކްޗަރ ތަރައްގީ ކުރުމަށް މިހާރު އޮތީ ކޮން ހުރަހެއް ކަމެއް ޝިފާން ވިދާޅެއް ނުވެއެވެ.

އެހެން ކަމުން އެސިސްޓެންޓް ކޮމިޝަނަރގެ ވާހަކައިން މިހާރު މި ހިނގާ،

ވައްކަމާއި، މީހުން ރަހީނު ކުރުމާއި ފޭރުމާއި މަސްތުވާ ތަކެތީގެ މައްސަލަތަކަކީ ކުރީ ސަރުކާރުގެ ސަބަބުން ހިނގާ ކަންތައްތައް ކަމަށް އާއްމުން ގަބޫލު ކޮށްލައިގެން ތިބެންވީއެވެ.

އެހެން އެކަން ވާކަށް ނެތެވެ. ޝިފާން "އެކްސް" ގައި ލިޔުއްވި ވާހަކައިން އުނިވާ މައުލޫމާތު ހުރިކަން އެ ލިޔުން ކީ ބައެއް ފަރާތްތަކުން ފާޙަގަ ކުރެއެވެ.

އެކްސް ގައި ކުރީގެ ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވަނީ ރައްޔިތުންގެ މަޖިލީސް އިންތިޚާބަށް ދޫކޮށްލި ކުށްވެރިންގެ އަދަދު ވެސް ހާމަ ކުރަން ޖެހޭނެ ކަމުގައެވެ.

އާއްމުންގެ އެހެން މީހަކުވެސް ހަމަ މި ނުކުތާ ފާހަގަ ކޮށްފައިވެއެވެ.

"މި ސަރުކާރުން މަޖިލިސް އިންތިޚާބަށް ކްލެމެންސީ ބޯޑު އުވާލާފައި، ކުޑަ ކޮމިޓީއެއް ހަދައިގެން ދޫކުރި ބޮޑެތި މުޖުރިމުންނާއި، ވަގުންގެ ވާހަކަ ވެސް ދައްކަ ބަލަ." ޝިފާނަށް ރައްދު ދެމުން އޭނާ ބުނެފައިވެއެވެ.

ކުށްވެރިންގެ އަދަބު ލުއިކޮށް ދޫކޮށްލުމަކީ ވަކި ސަރުކާރަކުން އެކަނި ކުރާނެ ކަމެއް ނޫނެވެ. އެހެން ކަމުން ކުށްވެރިން ދޫކުރީ ކުރީ ސަރުކާރުން އެކަނި ކަމަށް ދޭހަވާ ގޮތައް ޒިންމާދާރު މަގާމެއްގައި ހުންނެވި ފަރާތަކުން ވިދާޅުވުމަކީ މައްސަލަ ސިޔާސީ ކުރުމެވެ. އެއީ އާއްމުންގެ އެތައް ބަޔަކު ޝިފާންގެ ވާޙަކަ އަށް ރައްދު ދެމުން ފާހަގަ ކޮށްފައިވާ ނުކުތާއެކެވެ.

ޝިފާންގެ ވާހަކަ އާ ގުޅިގެން ސޯޝަލް މީޑިއާ ގައި އާއްމުންގެ ގިނަ ބަޔަކު ވަނީ އެތައް ސުވާލެއް އުފައްދާ، އެތައް ގިނަ ފާޑު ކިޔާފައެވެ.

ގިނަ މީހުންގެ ވާހަކައިން ޝިފާން ދެއްކެވީ ޒިންމާދާރު ވާހަކަ އެއް ނޫނެވެ.

ކުރީ ސަރުކާރު ބަހަނާ ދެއްކުން ނިމުމަކަށް އަންނާނީ ކޮން އިރަކުންތޯ އެތައް ބަޔަކު ވަނީ ސުވާލު އުފައްދާފައެވެ.

ދައުލަތުނެ ފުލުހުންގެ ޚިދުމަތުގައި ތިބި މީހުންނަށް ދޭން ޖެހޭ މުސާރައާ އިނާޔަތްތައް ބަރާބަރަށް އަންނަނީ ދެމުންނެވެ. އެހެން ކަމުން ކުރީގައި ވީ ކަމެއްގެ ވާޙަކަ ދައްކައިގެން މޮޅެއް ނެތެވެ. އެހެން ކަމުން އާއްމުން ބުނަނީ ތާކުން ތާކު ނުޖެހޭ ސަބަބުތައް ދެއްކުމުގެ ބަދަލުގައި މައްސަލަ ހައްލު ކުރަން ކުރަން ޖެހޭ މަސައްކަތްތައް ކުރުން މާ މުހިންމު ކަމަށެވެ.

އެކަކު ބުނެފައިވާ ގޮތުގައި ކުރީ ސަރުކާރުން ދޫކުރި ކުށްވެރި އަކު ދޫކޮށްފައިވަނީ، އެމީހަކު ދޫކޮށްލާތާ އެއް އަހަރުގެ ތެރޭގައި ކުށެއް ކޮށްފިނަމަ ހައްޔަރު ކޮށް ބަންދުކުރާނެ ކަމަށް ޝަރުތު ކޮށްފައި ކަމަށް ކުރިން ހާމަ ކޮށްފައި ވުމާއެކު، އޭރު ދޫކޮށްލި މީހުންގެ ތެރެއިން އަލުން ކުށް ކޮށްގެން ހައްޔަރު ކުރީ ކިތައް މީހުންކަން މިފަދަ ވާޙަކަ އެއް ދައްކަވާ އިރު ޝިފާން ސާފުކޮށްދެއްވަން ޖެހޭނެ ކަމަށެވެ.

މި މައްސަލައިގައި ޚިޔާލު ފާޅު ކުރި މީހުންގެ ނަޒަރުގައި ކުށްކުރުން ނުހުއްޓުވިގެން އުޅެނީ، ސަރުކާރުގެ ވެރިންނާ ގޭންގުތަކާ އޮންނަ ގުޅުމުގެ ސަބަބުންނެވެ. އެހެންވެ ކުށްކުރުން ހުއްޓުވުމުގައި ފުލުހުންގެ ބާރެއް ނެތް ކަމަށްވެސް ބުނެފައިވެއެވެ.

ޝިފާނުގެ ވާހަކަ ބައެއް މީހުން ސިފަކުރީ ސިޔާސީ ބަޔާނެއްގެ ގޮތުގައެވެ. އަދި ސިޔާސީ ސްޓޭޓްމަންޓް ދޭނީ ޔުނީފޯމުގައި ނޫން ކަމަށްވެސް ބުނުފައިވެއެވެ.

ބަހަނާ ދެއްކުމަށް ވުރެ ނުވަންޏާ ޔުނީފޯމް ބާލައިފައި އިސްތިއުފާ ދިނުން މާ ރަނގަޅު ވާނެ ކަމަށްވެސް މި މައްސަލައިގައި ފާޑުކީ މީހަކު ބުނެފައި ވެއެވެ.