މަޝްރޫއުތައް ހިންގަން ބަޖެޓުގައި ލާރި ނެތްނަމަ، 11 މިލިއަން ޚަރަދުކޮށްގެން ރަސްމީ ފާލަން ބަދަލު ކުރުމަށް މި ސަރުކާރުން މަޝްރޫއެއް ނުފަށާނެކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ޙުސައިން ޒިޔާދު ވިދާޅުވެއްޖެއެވެ.
ރަސްމީ ފާލަން ނުވަތަ "ޢިއްޒުއްދީން ފާލަން" އަލުން ތަރައްޤީކުރުމުގެ ޢަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީން މިހާރު ވަނީ ފަށާފައެވެ.
އެކަމާ ގުޅޭގޮތުން ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ޒިޔާދު ވިދާޅުވީ، އެއްކޮޅުން ދައުލަތުގައި ލާރި ނެތްކަމަށް ސަރުކާރުން ބުނާއިރު، އަނެއްކޮޅުން ސަރުކާރުން ބޭނުންވާ ކަންކަން ކުރަމުންދާ ކަމަށެވެ. އެގޮތުން 11 މިލިއަން ޚަރަދުކޮށްގެން ރަސްމީ ފާލަން ބަދަލު ކުރުމަށް މި ސަރުކާރުން މަޝްރޫއެއް ފަށާފައިވާ ކަމަށް ޒިޔާދު ވިދާޅުވިއެވެ.
އެއީ ދައުލަތުގައި ލާރި ނެތި ކުރެވޭނެ ކަންކަމެއް ނޫންކަމަށްވެސް މެންބަރު ވިދާޅުވިއެވެ.
އިއްޔެއާ ހަމައަށް ހަމަ ރީތިކޮށް ފެންނަން އޮތް ފާލަމެއް އެއީ، 11 މިލިއަން ޚަރަދުކޮށްލައިގެން ފާލަން ބަދަލުކޮށްލަނީ، ފައިސާ ނެތިގެން ސަލާމަތް ނުވެގެން އުޅޭ ޤައުމަކުން ކުރާ ޒާތުގެ ކަންކަމެއް ނޫން މި ފެންނަނީ،ވައިކަރަދޫ ދާއިރާގެ މެންބަރު ޙުސައިން ޒިޔާދު
އޭގެ އިތުރުން، ސަރުކާރުގެ ބައެއް މަޤާމުތަކުގައި ތިބޭ މީހުން ސަސްޕެންޑް ކުރުމާއި އަލުން ވަޒީފާ ދިނުމާއި، ވަޒީފާ ބަދަލު ކުރުން ފަދަ އެތައް ކަމެއް ހިނގަމުންދާކަމަށް ވެސް ޒިޔާދު ވިދާޅުވިއެވެ.
ޒިޔާދު ވިދާޅުވީ، ސަރުކާރު އަދިވެސް ހަމައަކަށް ނޭޅިގެން އުޅޭ ސަބަބަކީ ސަރުކާރުގެ "ޓީމު ބޮޑުކަމުންް" ކަމަށެވެ.
ރަސްމީ ފާލަން މަރާމާތު ކުރުމުގެ މަޝްރޫޢުގެ ދަށުން ކުރީގެ ޖެޓީ ރޫޅާލުމާއި، އައު ޖެޓީގެ ކޮންކްރީޓް މަސައްކަތާއި، ސްޓީލް ސްޓަރަކްޗަރ ފަރުމާކުރުމާއި، ލަކުޑި އަދި މަތިވަޑާމުގެ މަސައްކަތް ހިމެނެއެވެ.
މި މަޝްރޫޢަށް ގާތްގަނޑަކަށް 11.7 މިލިއަން ރުފިޔާއަށް ޚަރަދުވާނެކަމަށް އެމްޓީސީސީން މައުލޫމާތު ދެއެވެ.
ރަސްމީ ފާލަމުގެ މަސައްކަތް އެމްޓީސީސީއާ ޙަވާލުކޮށްފައިވަނީ 270 ދުވަސް ތެރޭގައި ނިންމާގޮތަށެވެ.
