ގޯތިތައް ހަވާލުކުރުން ލާޒިމްވާ ބިލު ތަސްދީގުނުކުރައްވާ ފޮނުވާލުމުން އެނގެނީ އަވަސް މުސްތުގްބަލެއްގައި ގޯތިތައް ހަވާލުކުރުމުގެ ވިސްނުމެއް މި ސަރުކާރުގެ ނެތްކަން ކަަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވިދާޅުވެއްޖެއެވެ.

ކުރީގެ ރައީސް އިބްރާހީމް މުހައްމަދު ޞާލިހުގެ ސަރުކާރުން ކުރިޔަށްގެންދިޔަ "ބިންވެރިޔާ" ސްކީމްގެ ދަށުން މާލެ ރައްޔިތުންނަށް ދޫކުރި ގޯތިތަކުގެ ތެރެއިން މިހާތަނަށް ހަވާލު ކޮށްފައި ނުވާ ގޯތިތައް ތިން މަސް ތެރޭގައި ހަވާލު ކުރަން ލާޒިމްވާގޮތަށް ބިމާ ބެހޭ ޤާނޫނަށް ގެނައި އިސްލާހުގެ ބިލު ރައީސުލްޖުމްހޫރިއްޔާ ތަސްދީގުނުކުރައްވާ އަލުން އަނބުރާ ރައްޔިތުންގެ މަޖިލީހަށް ފޮނުވާލެއްވީ ބުރާސްފަތި ދުވަހުއެވެ.

މިއީ ކުރީ ސަރުކާރުން ފެށި "ބިންވެރިޔާ" ސްކީމްގެ ދަށުން މާލެ ރައްޔިތުންނަށް ދޫކުރި ގޯތިތަކުގެ ދާއިމީ ލިސްޓު އާންމު ކުރިތާ އެތައް ދުވަހެއްވީ ނަމަވެސް މި ސަރުކާރުން އެ ގޯތިތައް ހަވާލު ނުކުރާ ކަމަށް ބުނެ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް ނަސީމް ހުށަހެޅުއްވި އިސްލާހެކެވެ.

މީކާއީލް ވިދާޅުވީ އެ ފަދަ ބިލެއް ފާސްކުރިޔަސް އިޚުލާސްތެރިކަމާއި އެކު މި ސަރުކާރުން އެ މަސައްކަތް ކުރިއަށް ގެންދާނެ ކަމާއި މެދު ސުވާލު އުފެދުނު ކަމަށެވެ. މިހާރު ކަންކަން ކުރާ ގޮތުން ސަރުކާރަށް ސިޔާސީ މަންފާ އެއް ނުލިބޭ ގޮތަށް އަނެއްކާވެސް އެ މަސައްކަތް ކުރިއަށް ގެންދާނެ ކަމަށް ނުބެލެވޭ ކަމަށް މިކާއީލް ވިދާޅުވިއެވެ. މަޖިލީހުގެ މެޖޯރިޓީން ފާސްކޮށްފި ނަަމަ އެކަމަށް އިޚުތިރާމްކުރާނެ ކަމަށް ސަރުކާރުން ބުނި ނަމަވެސް ސަރުކާރުގެ ޢަމަލުތައް ހުރީ އެހެން ނޫން ކަަމަށް މީކާއީލް ވިދާޅުވިއެވެ. އަދި މިހާރު ސަރުކާރުން ޢަމަލުކުރާ ގޮތުން ކޮންމެވެސް އިންތިޚާބަކާއި ދިމާކޮށް ނޫން ގޮތަކަށް ގޯތިތައް ދޫކޮށްފާނެ ކަމާއި މެދު ސުވާލު އުފެދޭ ކަމަށް ވެސް އޭނާ ވިދާޅުވިއެވެ.

މީކާއީލް ވަނީ އަދިވެސް ގޯތި ލިބުނު ގިނަ މީހުންނާއި ބިން ހަވާލު ނުކުރާ ކަަމަށާއި އެއީ ވަަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަމަށް ވިދާޅުވެފައެވެ. އެކަމާއި މެދު ވަރަށް ބޮޑަށް ކަންބޮޑުވެވަޑައިގަންނަވާ ކަމަށާއި 20 ވަނަ މަޖިލީހުގައި ވެސް އެކަމާއި މެދު އަޑު އުފުއްލަވާނެ ކަމަށް މީކާއީލް ވިދާޅުވިއެވެ. މަދު މެމްބަރުންތަކެއް އިދިކޮޅުގައި ތިބި ނަމަވެސް އެކަމާއި މެދު ވަކާލާތުކުރުން ދޫކޮށް ނުލައްވާނެ ކަމަށް ވެސް މީކާއިލް ވިދާޅުވިއެވެ.

މި އިސްލާހު ފާސްކޮށްފައިވަނީ ނިމިގެންދިޔަ 19 ވަނަ ރައްޔިތުންގެ މަޖިލީހުގެ އެންމެ ފަހު ދައުރުގެ ތެރޭގައި އޭޕްރީލް މަހުގެ 29 ވަނަ ދުވަހު ކުރިޔަށްދިޔަ ޖަލްސާގައެވެ. އިސްލާހު ފާސް ކުރަން ފެންނަ ކަމަށް ވޯޓު ދެއްވީ 35 މެންބަރުންނެވެ. އެ އިސްލާހާ ދެކޮޅަށް އެއްވެސް މެންބަރަކު ވޯޓެއް ނުދެއްވައެވެ.

އެ އިސްލާހުގައި ބުނާ ގޮތުން ގޯތިތައް ލިބޭ ފަރާތްތަކުގެ ދާއިމީ ލިސްޓު ގެޒެޓުގައި ޝާއިއު ކުރާތާ ތިން މަސް ތެރޭގައި އެ ގޯތިތައް ހަވާލު ކުރަން ޖެހޭނެއެވެ. އަދި މިހާތަނަށް ސަރުކާރުން ހަވާލު ކޮށްފައި ނުވާ ގޯތިތައް މި ގާނޫނަށް އަމަލުކުރަން ފަށާތާ ތިން މަސް ތެރޭގައި ހަވާލު ކުރަން ޖެހޭނެ ކަމަށް ވެސް އެ އިސްލާހުގައި ބުނެފައިވެއެވެ.