ސިޔާސީ ބޭފުޅުންގެ ގައިގައި އެއްވެސް ކަހަލަ އަސާސެއްނެތި ސަރުކާރުން އަތްލުމަށް މަސައްކަތް ކުރަނީ ގޮތް ހުސްވުމުން ކަމަށް ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ހުކުރު ދުވަހުގެ ރޭ ކުރިއަށް ގެންދިޔަ މިސްރާބު ހަމަ މަގަށް ހަރަކާތުގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ 20 ވަނަ ރައްޔިތުން މަޖިލީހުގެ މެޖޯރިޓީ އެމްޑީޕީން ނަގަންޖެހޭ ކަމަށާއި، އެމްޑީޕީއަށް މެޖޯރިޓީ ގެއްލިއްޖެނަމަ ރައީސް ޑރ.މުހައްމަދު މުއިއްޒު މިގައުމުގައި ތަންފީޒު ކުރަމުން ގެންދަނީ ހިތަށް ނުގެނޭވޭ ކަހަލަ ސިޔާސަތުތަކެއް ކަމަށާއި، ދަތި އުދަނގޫ ހިސާބަކަށް ގައުމު ގެންދާނެ ކަމަށެވެ.
އެމްޑީޕީގެ ޗެއާޕާސަން ފައްޔާޒު އިސްމާއިލް ފުލުހަށް ހާޒިރުކުރުމާއި ގުޅިގެން އެކަމަށް އިޝާރާތް ކުރައްވައި ރައީސް ސާލިހު ވިދާޅުވީ ސިޔާސީ މީހުންގެ ގައިގައި އަތްލަން ފަށަނީ ސަރުކާރު ގޮތް ހުސްވުމުން ކަމަށެވެ. އަދި ވިދާޅުވީ މިސަރުކާރު ބިރު ދެއްކުމަށް މަސައްކަތް ކުރި ނަމަވެސް އެމްޑީޕީގެ ލީޑަރޝިޕްގައި ބިރު ގަންނާނެ މީހަކު ނުހުންނާނެ ކަމަށެވެ.
އޭގެ ކިތަންމެ ހެއްކެތް މިހާރު ދަނީ ފެންނަމުން. އިއްޔެއަކީ މިސަރުކާރު ގޮތް ހުސްވެއްޖެކަން ފެނިގެންދިޔަ ދުވަހެއް. ރާއްޖޭގައި އޮތް އެންމެ ބޮޑު ޕާޓީގެ ޗެއާޕާސަން ދަމާފައި ފުލުހަށް ގެންދިޔައީ. ސިޔާސީ މީހުންގެ ގައިގައި އަތްލަން ފެށުމަކީ އެއްވެސް ކަހަލަ އަސާސެއް ނެތި ފުލުހަށް ގެންގޮސް ތަހުގީގު ކުރަން ފެށުމަކީ ސިޔާސީ ގޮތުން އެސަރުކާރު ގޮތް ހުސްވުން. ދަންނަވަންތޯ އެމްޑީއަކު ނުހުންނާނެ ކަމާއި ބިރު ގާންނާނެ މީހެއް. އެމްޑީޕީގެ ލީޑަރޝިޕްގައި ނުތިބޭނެ. ކިތަންމެ ވަރަކަށް އަޅުގަނޑުމެން ލީޑަރޝިޕް ގެންދިޔަސް. ޖަލުގެ ކުޑަ ގޮޑި ނުދެކޭ މީހަކު އެބަހުރިތޯ. އެއީ އަޅުގަނޑުމެން ހުއްޓުވަން ކުރާ ކަމެއް ކަމަށް ދެކޭ ވަންޏާ އަޅުގަނޑު ދަންނަވާނީ ސޮރީއޭ. އެކަމެއް ނުވާނެ.ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހީމް މުހައްމަދު ސާލިހު
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ހިޔާނާތުގެ މައްސަލައާ ގުޅިގެން ފައްޔާޒު ފުލުހަށް ހާޒިރުކޮށްފައިވަނީ 28 މާރިޗް 2024 ވީ ބުރާސްފަތި ދުވަހުގެ މެންދުރުފަހު 3:00ށެވެ.
ފައްޔާޒު ފުލުހަށް ހާޒިރުކޮށްފައިވަނީ އާރްޑީސީ އަށް ލިބޭ ފައިސާ އެކުންފުނީގެ ވެރިންނާއި، އާރްޑީސީއާއި ގުޅުން އޮންނަ ފަރާތްތަކާއި ކުންފުނިތަކަށް ދޫކޮށް އާރްޑީސީގެ ފައިސާއަށް ހިޔާނަތްތެރިވެފައިވާ މައްސަލާގައި އާރްޑީސީން ކޮށްފައިވާ މުއާމަލާތްތަކުގެ ތެރެއިން ފައްޔާޒަށް މާލީ މަންފާ ލިބިފައިވާ ކަމަށް ތުހުމަތުކުރެވޭތީ މައްސަލާގައި ސުވާލުކުރުމަށެވެ.
ބުރާސްފަތި ދުވަހުގެ މެންދުރުފަހު ފައްޔާޒު ފުލުހަށް ހާޒިރުވެވަޑައިގެންނެވުމަށްފަހު، ނުކުމެވަޑައިގަންނަވާ ނޫސްވެރިންނާ ވާހަކަ ދައްކަވަމުން އޭނާ ވިދާޅުވީ މިއީ ސިޔާސީ ބޭނުމަކަށް ކުރާ ކަމެއް ކަމަށާއި، މިއީ ކުރާ ފުރައްސާރައެއް ކަމަށެވެ. ފައްޔާޒު ވިދާޅުވީ ރައްޔިތުން މަޖިލިސް އިންތިޚާބު ބޯމަތިވެފައިވަނިކޮށް، ފުލުހަށް ހާޒިރުކުރަނީ ބިރުދެއްކުމަށް ކަމަށެވެ. އާރުޑީސީއިން ޚިޔާނާތެއް ވެއްޖެކަމަށްބުނެ ބަލާ މައްސަލައަކީ އެއްވެސް ހަގީގަތެއް އެކުލެވޭ މައްސަލައެއް ނޫން ކަމަށާއި، ތުހުމަތެއް ކުރެވިދާނޭފަދަ އެއްވެސް ކަމެއް ކޮށްފައި ނޯންނާނެކަމަށް ފައްޔާޒު ވިދާޅުވިއެވެ.