ކެންޑިޑޭޓެއްގެ އިންތިޚާބީ ހައްގަކަށް އުނިކަމެއް އަތުވެދާނެ އެއްވެސް ކަމެއް ނުކުރުމަށް އިލެކްޝަންސް ކޮމިޝަން (އީސީ)އިން އިލްތިމާސްކޮށްފިއެވެ.

ރައްޔިތުން މަޖިލީހުގެ އިންތިޚާބު 2024ށް ތައްޔާރުވުމުގެ މަސައްކަތްތައް އީސީން ކުރަމުންދާއިރު، އެކޮމިޝަނުން ބުނީ ކެންޑިޑޭޓެއްގެ އިންތިޚާބީ ހައްގަކަށް އުނިކަމެއް އަތުވެދާނެފަދަ ކަމެއް އެހެން ފަރާތަކުންކުރާނަމަ އެކަމުގެ ޝަކުވާ ހުށަހަޅައި އެކަމެއް ހުއްޓުވައި ދިނުމަށް އެދުމުގެ ހައްގު އެ ކެންޑިޑޭޓަކަށް ލިބިގެންވާ ކަމަށެވެ. އަދި މިފަދަ ކަންކަން ފާހަގަކުރެވޭނަމަ ގުޅުންހުރި އިދާރާތަކަށް މައްސަލަ ހުށަހެޅުމަށް އީސީން އެދިފައިވެއެވެ.

ކެންޑިޑޭޓެއްގެ އިންތިޚާބީ ހައްގަކަށް އުނިކަން އަތުވެދާނެ ފަދަ ކަންކަން ނުކުރުމަށް އިލްތިމާސްކޮށް އީސީން ބުނީ އިންތިޚާބުތަކާއިބެހޭ އާންމު ގާނޫނުގެ 29 ވަނަ މާއްދާގެ (ށ)ގައި އެއްވެސް ކެންޑިޑޭޓަކަށް ތާއީދު ހޯދުމަށް ކުރާ މަސައްކަތުގައި އެހެން ކެންޑިޑޭޓެއްގެ އިންތިޚާބީ ހައްގަކަށް އުނިކަން އަތުވެދާނެ އެއްވެސްކަމެއް ކޮށްގެން ނުވާނެކަމަށް ބަޔާންކޮށްފައިވާ ކަމަށެވެ.

ހަމައެހެންމެ ރައްޔިތުން މަޖިލީހުގެ އިންތިޚާބުގެ ގަވާއިދު 2024 ގެ 24 ވަނަ މާއްދާގެ (ހ)ގެ 7 ވަނަ ނަންބަރުގައި ތާއީދު ހޯދުމުގެ ގޮތުން ކެންޑިޑޭޓަކު ނުވަތަ އޭނާ ނިސްބަތްވާ ޕާޓީއަކުން ނުވަތަ އެކެންޑިޑޭޓަކަށް ތާއީދުކުރާ ބަޔަކު ބަހައްޓާ ޕޯސްޓަރު ނުވަތަ ނިޝާން ނުވަތަ އެ ކެންޑިޑޭޓަކު ރަމްޒުކޮށްދޭ އެފަދަ އެހެންވެސް އެއްޗެއް، އެހެން ކެންޑިޭޓަކަށް ނުވަތަ އެހެން ކެންޑިޑޭޓަކަށް ތާއީދުކުރާ ބަޔަކު ނައްޓައި ހަލާކުކޮށް ގެއްލުންދީގެން ނުވާނެ ކަމަށް އީސީން ބުނެފައިވެއެވެ.

ކެންޑިޑޭޓެއްގެ އިންތިޚާބީ ހައްގަކަށް އުނިކަމެއް އަތުވެދާނެފަދަ އެއްވެސް ކަމެއް ނުކުރުމަށް އީސީން އިލްތިމާސްކޮށްފައިވާއިރު، މިފަހުން މާލެސިޓީގެ ބޮޑެތި މަގުތަކުގައި ކެންޑިޑޭޓުން ހަރުކޮށްފައިހުރި ޕޯސްޓަރުތަކަށް ވަނީ ގެއްލުންދީފައެވެ. މި މައްސަލަތައް ބަލައިދިނުމަށް ބައެއް ކެންޑިޑޭޓުންގެ ފަރާތުން ފުލުހުންނަށް މައްސަލަ ހުށަހަޅާފައިވެއެވެ.