ޒުވާން ކުޅުންތެރިންނާއެކު ޗެލްސީން ކުރަމުން ދަނީ ތަފާތު މަސައްކަތެއް ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

ޕޮޗެޓީނޯ މިހެން ބުނީ، އިނގިރޭސި ޕްރިމިއާ ލީގުގައި ޗެލްސީން ނިއުކާސަލް ޔުނައިޓެޑާ ދެކޮޅަށް ކުޅުނު މެޗަށްފަހު ވާހަކަ ދައްކަމުންނެވެ. އަމިއްލަ ދަނޑުގައި ނިއުކާސަލާ ދެކޮޅަށް ކުޅުނު މެޗުން ޗެލްސީ ވަނީ މޮޅުވެފަ އެވެ.

އެ މެޗަށްފަހު ވާހަކަ ދައްކަމުން ޕޮޗެޓީނޯ ބުނީ، ޗެލްސީގައި ތިބި ގިނަ ކުޅުންތެރިންނަކީ ޒުވާން ކުޅުންތެރިން ކަމަށާއި، އެ ކުޅުންތެރިންނާއެކު ކުރިއަށް ދާން ވަގުތު ނަގާނެކަން އެންމެން ވެސް ޤަބޫލު ކުރަން ޖެހޭ ކަަމަށެވެ. އޭނާ ބުނީ ޗެލްސީން މިހާރު މަސައްކަތް ކުރަމުން ދަނީ މުޅިން ތަފާތު، އެހެން ޕްރޮޖެކްޓެއްގައި ކަމަށެވެ.

އިތުރަށް އޭނާ ބުނީ މިހާރު އޮތް ޗެލްސީ އަކީ، މީގެ ކުރިން އޮތް ޗެލްސީއާ ވަރަށް ތަފާތު ޗެލްސީއެއް ކަމަށެވެ. ނަމަވެސް ބައެއް ފަރާތްތަކަށް އެކަން އޮޅިފައިވާކަން ފާހަގަކޮށް ޕޮޗެޓީނޯ ބުނީ، އޭނާ އާއި ޗެލްސީގެ ކުޅުންތެރިން މަސައްކަތް ކުރަމުން ދަނީ ޓީމު ކުރިއަށް ގެންގޮސް، ކާމިޔާބުގެ މަގަށް ވާސިލްވުމަށެވެ.

ޕޮޗެޓީނޯ ބުނީ، ޗެލްސީގެ އިސްވެރިންނާ އޭނާއާ އޮންނަ ގުޅުން ރަނގަޅު ކަމަށެވެ. ކުލަބުގެ އެންމެހާ ވެރިންނާއެކު ވެސް އޮންނަނީ ވަރަށް ގާތް ގުޅުމެއް ކަމަށާއި، ވެރިން ވެސް ތިބީ ޓީމުގެ ކޯޗިން އޮފިޝަލުން އަދި ކުޅުންތެރިންނަށް ހިތްވަރުދީ ކުރިއަށް ދާން ކަމަށް ވެސް ޕޮޗެޓީނޯ ވަނީ ބުނެފަ އެވެ.

މި ސީޒަންގައި ވެސް ޗެލްސީގެ ނަތީޖާތައް ދަށްވެފައިވާއިރު، ޕްރިމިއާ ލީގުގަައި އެ ޓީމު އޮތީ ވެސް 11 ވަނައިގަ އެވެ. އެއީ މިހާތަނަށް ކުޅުނު 27 މެޗުން 39 ޕޮއިންޓު ހޯދައިގެންނެވެ. މި ސީޒަންގެ ޕްރިމިއާ ލީގުގައި ޗެލްސީން 27 މެޗު ކުޅެފައިވާއިރު، މޮޅުވެފައި ވަނީ 11 މެޗުންނެވެ. 10 މެޗުން ބަލިވެފައިވާއިރު، ހަ މެޗުން ވަނީ އެއްވަރުވެފަ އެވެ.