ޑައިރެކްޓަރ ފައްތާހުގެ އެންމެ ފަހުގެ ފިލްމު "ހައްދު" ގެ ޓިކެޓް ވިއްކަން ތައްޔާރު ވެއްޖެއެވެ.
ފައްތާހު ބުނީ އޮގަސްޓް 8 ވަނަ ދުވަހު ޓިކެޓް ވިއްކަން ފަށާއިރު ސެޕްޓެމްބަރު 6 ގައި ސިނަމާތަކަށް ނިކުންނަ މި ފިލްމުގެ ހުރިހާ ޝޯއެއްގެ ޓިކެޓް ވެސް ވިއްކާނީ 100ރ. އަށް ކަމަށެވެ.
އެގޮތުން މީޑިޔާތަކަށް ފިލްމު ޕްރިމިއާ ކުރަން އޮތީ ވަކިން ރެޑް ކާޕެޓް އިވެންޓެއް ކަމަށާއި އާންމުންނަށް ފިލްމު ޕްރިމިއަރ ކުރާއިރުވެސް ހާއްސަ ކަންތައްތަކެއް ފެނިގެންދާނެ ކަމަށް ފައްތާހު ބުންޏެވެ.
7 ސެޕްޓެމްބަރ ގައި އައްޑޫ ސިޓީގައި އަދި ކުޅުދުއްފުށީގައި 14 ސެޕްޓެމްބަރގައި ފިލްމު ރިލީޒް ކުރުމަށް ނިންމާފައިވާ ކަމަށް ވެސް އޭނާ ބުންޏެވެ.
މި ފިލްމުގެ އޮފިޝަލް ޓްރެއިލާވަނީ ރާއްޖެޓީވީ މެދުވެރިކޮށް ނެރެފައެވެ. މިފިލްމުގެ އޮފިޝަލް މީޑިއާ ޕާޓްނާއަކީ ރާއްޖެޓީވީއެވެ. މި ޓްރެއިލާ ނެރުމަށް ފަހު ޑައިރެކްޓަރ ފައްތާހު ބުނީ "ހައްދު" ޝޫޓިން ކާމިޔާބުކަމާ އެކު ކުރިއަށް ގެންދިއުމަށް އެފިލްމުގެ މުޅި ކްރޫގެ ހީވާގިކަން ފާހަގަކުރާ ކަމަށެވެ.
ފައްތާހު ބުނީ މި ފިލްމުގައި ދިވެހިންގެ ހިތްތަކަށް ބޭނުންވާނެ ތަފާތު ރަހަތައް ފެންނާނެ ކަމަށެވެ.
"މި ފިލްމުގެ ޕްރެޒެންޓޭޝަން ތަފާތު ވާނެ.. ހުށައަޅައިދިނުން... ބަލާލަން ހިއްގައިމު ވާނެ...މިހާތަނަށް ދިވެހި ފިލްމަކުން ނުފެންނަ މަންޒަރުތައް ފެންނާނެ،" ފައްތާހު ބުންޏެވެ.
މަހުދީގެ ވާހަކައެއްގެ މައްޗަށް ބިނާކޮށް އުފައްދާ މި ފިލްމު ބަލާލުމުން "ހައްދު ފަހަނަ އެޅުމުން" ވާނެ ގޮތް އެނގިގެން ދާނެ ކަމަށް ވެސް ބުންޏެވެ. މި ފިލްގެ މަންޒަރުތައް ނަގާފައި ވަނީ ހއ. ކެލާ، ރ. ވާދޫ، މާލެ އަދި މާލެ ކައިރި ރިސޯޓްތަކުގައެވެ.
ތަރިންގެ ރޯލުން ފެނިގެން ދަނީ މަރިޔަމް އައްޒަ، އައިމިނަތު ރިޝްފާ އަދި މި ދާއިރާއަށް އަލަށް ތައާރަފްވާ ޝިބާން އަހުމަދު އެވެ.
