ބޮލީވުޑް އެކްޓްރެސް ކެޓްރީނާ ކައިފް އޭނާގެ ކުރީގެ ލޯބިވެރިޔާ އަދި މެގަ ސްޓާ ސަލްމާން ޚާންއާ އެކު ކުޅެމުންދާ ފިލްމް "ޓައިގާ ޒިންދާހޭ" ގެ ޝޫޓިންގެ އެންމެ ފަހުގެ މަންޒަރުތައް ނަގާނީ އަބޫދާބީގައި ކަމަށް ޕްރޮޑަކްޝަން ޓީމުން ބުނެފިއެވެ.
"ޓާއިގާ ޒިންދާހޭ" އަކީ ބެލުންތެރިންގެ ފަރާތުންނާއި ބޮކްސް އޮފީހުގައި ބޮޑު ކާމިޔާބީއެއް ހޯދި "އޭކް ތާ ޓައިގާ" ގެ ދެވަނަ ބައެވެ.
މި ދެތަރިން އެކުގައި އެންމެ ފަހުން ފެނިފައި ވަނީ ވެސް މީގެ ފަސް އަހަރު ކުރިން "އޭކް ތާ ޓައިގާ" އިންނެވެ.
މިފިލްމުގެ މަންޒަރުތައް ނެގުމަށް މި ދެތަރިން އެކުގައި ވަނީ މޮރޮކޯއަށް ގޮސްފައެވެ. މޮރޮކޯގައި ނަގާފައި ވަނީ އެކްޝަން ސީންތަކެކެވެ. އެހެންކަމުން ފިލްމުގެ ކްލައިމެކްސް ސީންތައް އަބޫ ދާބީގައި ނެގުމަށް ނިންމާފައިވާ ކަމަށް ޚަބަރުތައް ބުނެއެވެ.
ކަލާސްއިން ދައްކާ ރިއަލިޓީ ޝޯޗް ބިގް ބޮސް 11ގެ ޕްރޮމޯޝަނަލް ޝޫޓިންއަށް ފަހު މިމަހުގެ 6 އިން 7 އަށް ސަލްމާން އަބޫ ދާބީއަށް ދިއުމަށް ފުރާނެއެވެ. އެގޮތުން އަބޫ ދާބީގައި ކުރިއަށްދާނީ ފިލްމުގެ އެންމެ ފަހުގެ މަންޒަރުގެ ނެގުމުގެ މަސައްކަތެއެވެ.
މީގެ ކުރިން ފިލްމުގެ މަންޒަރުތައް ވަނީ އޮސްޓްރިއާގައިވެސް ނަގާފައެވެ. އެގޮތުން "ޓައިގާ ޒިންދާހޭ"ގެ ޓައިޓްލް ލަވަ "ދިލް ދިޔަން ގައްލަން" ގެ ރޮމޭންޓިކް މަންޒަރުތަކެއް ސަލްމާންއާއެކު ކެޓްރީނާ ވަނީ ޝޫޓްކޮށްފައެވެ.
"ޓައިގާ ޒިންދާ ހޭ" ފުރަތަމަ މަންޒަރު ސަލްމާން ހިއްސާކޮށްފައިވާއިރު އެ ފޮޓޯ އިން ފެނިގެން ދަނީ ދެ މީހުން އެކަކު އަނެކަކަށް ބަލަން ތިބޭ މަންޒަރެވެ.
ސަލްމާން ހާން މި ފިލްމުގައި ފެނިގެން ދާނީ އިންޑިއާގެ ޖާސޫސީ އިދާރާ ކަމަށްވާ ރޯގައި މަސައްކަތްކުރާ އެޖެންޓެއްގެ ރޯލުންނެވެ. އަދި ކެޓްރީނާ ފެނިގެން ދާނީ ޕާކިސްތާނުގެ ޖާސޫސީ އިދާރާގައި މަސައްކަތްކުރާ ސްޕައި އެޖެންޓެއްގެ ރޯލެވެ.
މިފިލްމު ރިލީޒްކުރުމަށް ހަމަޖެހިފައިވަނީ ޑިސެމްބަރ 22، 2017 ގައެވެ.
