ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ޖަރުމަނުގެ އާރްބީ ލައިޕްޒިގާ ދެކޮޅަށް ކުޅުނު މެޗުން، ސްޕެއިންގެ ރެއާލް މެޑްރިޑު މޮޅުވެއްޖެ އެވެ.

މި ދެ ޓީމުގެ ފުރަތަމަ ލެގު ކުޅުނީ ލައިޕްޒިގް އަމިއްލަ ދަނޑުގަ އެވެ. އަންގާރަ ދުވަހުގެ ރޭ ކުޅުނު މެޗު ރެއާލުން ކާމިޔާބު ކުރީ 1-0 އިންނެވެ.

އަނިޔާގެ މައްސަލަތަކެއްގެ ތެރޭގައި އޮތް ރެއާލުން ލައިޕްޒިގާ ދެކޮޅަށް ކުޅުނު މެޗުގައި އިންގްލެންޑުގެ ޖޫޑް ބެލިންހަމް ނުކުޅެ އެވެ. ބެލިންހަމް އަކީ ރެއާލަށް ބަދަލުވެ އެ ޓީމުގައި މޮޅަށް ކުޅެމުން އަންނަ ކުޅުންތެރިޔެކެވެ. މެޗުން ރެއާލް މޮޅުވީ ދެ ވަނަ ހާފު ފަށައިގެން ތިން ވަނަ މިނެޓުގައި ބްރަަހަމް ޑިއާޒް ޖެހި ލަނޑުންނެވެ. މެޗުގައި ރެއާލުން މޮޅަށް ކުޅުނުއިރު، ލައިޕްޒިގުން ވެސް ވަނީ ލަނޑު ޖަހާނެ ފުރުސަތު ތަނަވަސްކޮށްފަ އެވެ. ރެއާލްގެ ގޯލުގައި ހުރި ބަދަލު ކީޕަރު އަންޑްރީ ލުނިން މޮޅު ކުޅުމެއް ދައްކަައި، މުހިންމު ބޯޅަތަކެއް ސޭވް ކޮށްފަ އެވެ.

ރެއާލްގެ ދަނޑުގައި މި ދެ ޓީމު ވާދަކުރާ ދެ ވަނަ ލެގުގެ ކުޅުން އޮންނާނީ މާޗު މަހުގެ ހަތް ވަނަ ދުވަހު އެވެ. ރެއާލަކީ ޗެމްޕިއަންސް ލީގުގެ ތާރީޚުގައި ވެސް އެންމެ ކާާމިޔާބު ޓީމެވެ.