ސްޕެއިންގެ ބާސެލޯނާގެ ކޯޗުކަމާ ހަވާލުވާން، ޖަރުމަނުގެ ހަންސީ ފްލިކް ޝައުޤުވެރިވާ ކަމަށް މީޑިއާ ރިޕޯޓުތައް ބުނެފި އެވެ.

ބާސެލޯނާގެ ކޯޗުކަމުގައި މިހާރު ހުރި އެ ޓީމުގެ ލެޖެންޑް ޒަވީ ހެނާންޑޭޒް ވަނީ، މި ސީޒަނަށް ފަހު އެ ކުލަބު ދޫކޮށްލަން ނިންމައިފަ އެވެ. އެއާއެކު ބާސެލޯނާ އިން އަންނަނީ އައު ކޯޗެއް ހޯދުމުގެ މަސައްކަތް ކުރަމުންނެވެ. ބާސެލޯނާ އިން ގެންނަން ބޭނުންވާ ކޯޗުންގެ ލިސްޓުގައި އުމުރުން 53 އަހަރުގެ ފްލިކް ހިމެނޭ ކަމަށް މީގެ ކުރިން ސްޕެއިންގެ މީޑިއާ ތަކުން ވަނީ ރިޕޯޓުކޮށްފަ އެވެ. ނަމަވެސް، އެކަމާ ގުޅިގެން ބާސެލޯނާ އިން ވަކި އެއްޗެއް ބުނެފައެއް ނުވެ އެވެ.

ސްޕެއިންގެ މީޑިއާ ތަކުގަައި ބުނެފައިވާ ގޮތުން، މިވަގުތު އެއްވެސް ވަޒީފާއެއް ނެތި ހުރި ފްލިކްގެ ޝައުޤުވެރިކަން ބާސެލޯނާ އަށް އެބަ އޮތެވެ. އަދި ޒަވީގެ ބަދަލުގައި ބާސެލޯނާ އިން އެހެން ކޯޗެއް ހޯދުމުގެ މަސައްކަތް ކުރަމުން އަންނައިރު، ފްލިކް ހުރީ އެކަމަށް ތައްޔާރަށް ކަމަށް ވެސް ވަނީ ރިޕޯޓުކޮށްފަ އެވެ. އެކަމާ ގުޅޭ ގޮތުން ބާސެލޯނާ އާއެކު އިތުރު މަޝްވަރާތައް ކުރިއަށް ގެންދަން އޭނާ ބޭނުންވާ ކަމަށް ވެސް ބުނެފައިވެ އެވެ.

ފްލިކް އެންމެ ފަހުން ހުރީ ޖަރުމަނު ޤައުމީ ޓީމުގެ ކޯޗުކަމުގެ މަގާމުގަ އެވެ. އެ މަގާމަށް އޭނާ ހަމަޖެއްސީ 2021 ވަނަ އަހަރު އެވެ. ނަމަވެސް، 2022 ވަނަ އަހަރު ޤަތަރުގައި އޮތް ފީފާ ވޯލްޑް ކަޕްގައި ޖަރުމަނަށް ނަތީޖާ ނުނެރެވި، އޭގެ ފަހުން ވެސް ޖަރުމަނުގެ ނަތީޖާތައް ދަށްވުމުން 2023 ވަނަ އަހަރު ވަނީ އޭނާ މަގާމުން ވަކިކޮށްފަ އެވެ. އޭގެ ފަހުން ފްލިކް ހުރީ އެއްވެސް ވަޒީފާއެއް ނެތި އެވެ.

މީގެ ކުރިން ޖަރުމަނުގެ އެސިސްޓެންޓް ކޯޗެއްގެ ގޮތުގައި ވެސް މަސައްކަތް ކުރި ފްލިކް ވަނީ، ޖަރުމަނުގެ ގަދަ ބާރު ބަޔާން މިއުނިކަށް ވެސް އިރުޝާދު ދީފަ އެވެ. އެންމެ ފުރަަތަމަ 2019 ވަނަ އަހަރު އޭނާ ހަވާލުވީ އެ ކުލަބުގެ އެސިސްޓެންޓު ކޯޗުގެ މަގާމާ އެވެ. އޭގެ ފަހުން، ހަމަ އެ އަހަރު އޭނާ ވަނީ ކޯޗުގެ މަގާމަށް ވެސް ހަމަޖައްސައިފަ އެވެ. ފްލިކްގެ އިރުޝާދުގެ ދަށުން ބަޔާނުން ވަނީ ގިނަ ކާމިޔާބީތަކެއް ވެސް ހޯދައިފަ އެވެ. އޭނާގެ އިރުޝާދުގެ ދަށުން އެ ކުލަބު ވަނީ ޖަރުމަނު ލީގު، ޖަރުމަނު ކަޕް، ޖަރުމަނު ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކޮށްފަ އެވެ.