އަބަދު ވެސް އިސްކުރީ ކުލަބުގެ މަސްލަހަތު ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.
ޒަވީ މިހެން ބުނީ، މި ސީޒަނަށްފަހު ބާސެލޯނާ ދޫކޮށްލާނެކަން އިއުލާން ކުރުމަށްފަހު އެވެ. ބާސެލޯނާ ދޫކޮށްލަން ނިންމާފައިވާކަން ޒަވީ އިއުލާން ކުރުމާއެކު، ނޫސްވެރިންގެ ގިނަ ސުވާލުތަކެއް އޭނާ އަށް އަމާޒުވި އެވެ. އެގޮތުން، ދާދި ފަހުން އެއްބަސްވުން އައު ކޮށްފައިވާއިރު، ކުއްލި އަކަށް ކުލަބު ދޫކޮށްލަން ނިންމުމުން ނޫސްވެރިން ޒަވީ އަށް އެ ސުވާލު އަމާޒު ކުރި އެވެ.
ޒަވީ ބުނީ، އޭނާގެ ނިންމުމާ އެއްބަސްވުމާ އެއްވެސް ގުޅުމެއް ނޯންނާނެ ކަމަށެވެ. ޚާއްސަކޮށް، އެއްބަސްވުމުގެ އެއްވެސް ކަމެއް މައްސަލަ އަކަށް ނުވާނެ ކަމަށާއި، ނިންމުން ނިންމީ މައްސަލައެއް ދިމާނުވާނެ ގޮތަށް ކަމަށް ޒަވީ ބުންޏެވެ. ޒަވީ ފާހަގަ ކޮށްފައިވާ ގޮތުގައި، އެ ނިންމުން އޭނާ ނިންމީ މިހާތަނަށް ފެނުނު މަންޒަރާއި، އިވުނު އަޑު އަދި ތަޖުރިބާ އަށް ބެލުމަށްފަހު އެވެ.
މީގެ އިތުރުން ޒަވީ ބުނީ، އޭނާ އަކީ އަބަދު ވެސް ކުލަބުގެ މީހެއް ކަމަށާއި، އެކަމާ ދެކޮޅު ހެދޭނެ އެއްވެސް މީހަކު ނުހުންނާނެ ކަމަށެވެ. ޚާއްސަކޮށް، އޭނާގެ އަމިއްލަ އެދުމާއި، ބޭނުންތަކުގެ ކުރިއަށް، އަބަދު ވެސް ނެރެފައި ވާނީ ކުލަބުކަން ޒަވީ ވަނީ ފާހަގަ ކޮށްފަ އެވެ. ޚާއްސަކޮށް އޭނާގެ ހުރިހާ ކަމެއް ކުލަބަށްޓަކައި ޤުރުބާން ކޮށްފައިވާނެ ކަމުގައި ވެސް ޒަވީ ބުންޏެވެ.
ބާސެލޯނާ ދޫކޮށްލަން ޒަވީ ނިންމީ، އެއްބަސްވުމުގައި ބާކީ އެއް އަހަރު އޮއްވަ އެވެ. އެކަން އޭނާ އިއުލާން ކުރިއިރު، ޒަވީ އަށް އޮތީ ވަރަށް ބޮޑަށް ޕްރެޝަރު ބޮޑުވެފަ އެވެ. ޚާއްސަކޮށް، ބާސެލޯނާ އިން މި ސީޒަންގައި ނެރެމުން އަންނަ ނަތީޖާތައް ދަށްވުމުން، އިންތިހާ އަށް އޭނާ އަށް ފާޑު ކިޔުން އޮތީ އަމާޒުވެފަ އެވެ.
