ފްރާންސްގެ ޕީއެސްޖީގައި ކޮންޓްރެކްޓް ހަމަވަމުންދާ ފޯވަޑް ކީލިއަން އެމްބާޕޭ ގަތުމަށް ލިވަޕޫލުން 33 މިލިއަން ޕައުންޑް ހޭދަކުރަން ތައްޔާރުވެއްޖެއެވެ.

ލިވަޕޫލުން މި އަގު ދޭން މަޝްވަރާކުރަން ފެށީ، އެމްބާޕޭއަކީ ފްރީ ޓްރާންސްފަރއެއްގައި ލިބެންހުރި ކުޅުންތެރިއަކަށް ވުމުންނެވެ. ނަމަވެސް މިކަމާމެދު އެއްވެސް ފަރާތަކުން ރަސްމީކޮށް ވާހަކައެއްނުދައްކައެވެ.

ފްރާންސްގެ މީޑިއާތަކުން ބުނާގޮތުގައި ޕީއެސްޖީގެ ވެރިން ތިބީ އެމްބާޕޭ ސްޕޭނުގެ ރެއާލް މެޑްރިޑަށް ދިޔަނުދިނުމަށް ބާރު އަޅައިގެންނެވެ. ސަބަބަކީ މެޑްރިޑް، ޕީއެސްޖީގެ ނުގަބޫލުގައި ފްރާންސްގެ ކެޕްޓަން ގަތުމަށް ދެ ފަހަރެއްގެ މަތިން މަސައްކަތްކުރުމެވެ.

ލިވަޕޫލަކީ އެމްބާޕޭ ކުޅެން ބޭނުންވާ ކުލަބެކެވެ. ސަބަބަކީ އެއީ އޭނާގެ މަންމަ ސަޕޯޓަކުރާ ކުލަބަށްވާތީއެވެ. އަދި އޭނާ ބޭނުންވަނީ ޔޫރަޕުގެ ވަރުގަދަ ލީގެއްގައި ކުޅެން ކަމަށްވެސް ވާތީއެވެ. ސްޕޭން ލީގަށް ނުދެވޭނަމަ އޭނާ އެންމެ ބޭނުންވަނީ ވެސް އިނގިރޭސި ލީގުގައި ކުޅެން ބަދަލުވުމަށެވެ. ސައޫދީ އަރަބިއްޔާގެ ލީގުން އޭނާއަށް ބޮޑު މުސާރައެއް ހުށަހެޅިނަމަވެސް އެ ލީގަށް އޭނާގެ ޝައުގުވެރިކަމެއް ނެތެވެ.

ރިޕޯޓްތައް ބުނާގޮތުން، އެމްބާޕޭ ލިވަޕޫލަށް ބަދަލުވާނަމަ އެކުލަބުން އޭނާއަށް ދޭނީ ޕީއެސްޖީން މުސާރައިގެ ގޮތުގައި ދޭ އަދަދުގެ ދެބައިކުޅަ އެއްބައިހާ މަދު އަދަދެކެވެ. ސަބަބަކީ ލިވަޕޫލްގެ މާލީ ހާލަތު، ޕީއެސްޖީން ދޭ މުސާރައަށްވުރެ ބޮޑު މުސާރައެއް ދިނުމަށް ތަންނުދޭތީއެވެ.