ސްޕެނިޝް ސުޕަ ކަޕްގެ ފައިނަލްގައި ބާސެލޯނާގެ ފަރާތުން ފެނުނީ، ފައިނަލް މެޗެއްގައި ފެންނަން ޖެހޭ ފެންވަރުގެ ކުޅުމެއް ނޫން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ސައޫދީ އަރަބިއްޔާގައި ކުޅުނު ފައިނަލް މެޗުގައި ވާދަވެރި ރެއާލް މެޑްރިޑާ ވާދަކޮށް ބާސެލޯނާ ވަނީ ބަލިވެފަ އެވެ. އެ މެޗަށްފަހު ނޫސްވެރިންނާ ވާހަކަ ދައްކަމުން ޒަވީ ބުނީ، ބާސެލޯނާގެ އެންމެހާ ސަޕޯޓަރުންގެ ކިބައިން އޭނާ މައާފަށް އެދެން ބޭނުންވާ ކަމަށެވެ.
އެގޮތުން ފައިނަލް މެޗުގައި ބާސެލޯނާ އިން ދެއްކީ ދަށް ކުޅުމެއް ކަމަށް އޭނާ ވަނީ ފާހަގަކޮށްފަ އެވެ. އަދި ޚާއްސަކޮށް ވާދަވެރި ރެއާލާ ދެކޮޅަށް ދައްކަން ޖެހޭ ފެންވަރުގެ ކުޅުމެއް ނޫން ކަމަށް ވެސް އޭނާ ވަނީ ބުނެފަ އެވެ. މިކަން އިތުރަށް ފާހަގަކޮށް ޒަވީ ބުނީ، މިކަމުގެ ފުރިހަމަ ޒިންމާ ނަގަން ޖެހޭ ފަރާތަކީ އޭނާ ކަމަށެވެ. އެހެންކަމުން މިހާރު ދެން ކުރަން އޮތް ކަމަކީ، ހެދުނު ގޯސްތައް ދެނެގަނެ ކުރިއަށް އޮތް ތަނުގައި އެކަންކަން ރަނގަޅު ކުރުން ކަމަށް އޭނާ ބުންޏެވެ. ޒަވީ ޤަބޫލު ކުރާ ގޮތުގައި ބާސެލޯނާ އަށް ލިބުނީ ހިތްދަތި ބައްޔެކެވެ. ނަމަވެސް އޭނާ އަށް އޮތް ޔަގީން ކަމަކީ، ބާސެލޯނާ އިން މިހާރަށްވުރެ ވަރުގަދަކޮށް އެނބުރި އަންނާނެ ކަމުގެ ޔަގީންކަމެވެ.
މީގެ އިތުރުން ޒަވީ ބުނީ މިފަދަ ދަނޑިވަޅުތަކުގައި ކޯޗަށް ބޮޑު ޕްރެޝަރެއް އަންނާނެކަން އެނގޭ ކަމަށާއި، އެކަންކަމާ ކުރިމަތިލާން ތައްޔާރު ކަމަށެވެ. ނަމަވެސް، އޭނާގެ ވިސްނުން ހުރީ އެ ދިމާލަށް ނޫން ކަމަށާއި، ވިސްނުން ހުރީ އޭނާގެ މަަސައްކަތަށް ކަމަށް ވެސް ޒަވީ ބުންޏެވެ. އެހެންކަމުން، މާދަމާ ވެސް މަސައްކަތް ކުރާނީ ކުރިއަށް ހުރި މެޗުތަކަށް ކަމަށް ވެސް ޒަވީ ވަނީ ބުނެފަ އެވެ. އޭނާ ފާހަގަ ކުރި ގޮތުގައި ޕްރެޝަރާއެކު ވެސް ކުރިއަށް ދާން ޖެހޭނެ އެވެ. އަނެއްކޮޅުން ކަންކަން އަނބުރާލުމުގެ ޤާބިލުކަން ވެސް ބާސެލޯނާ އަށް އޮންނާނެ ކަމަށް އޭނާ ވަނީ ބުނެފަ އެވެ.
ބާސެލޯނާ އިން ވަނީ މިދިޔަ ސީޒަންގެ ސްޕެނިޝް ސުޕަ ކަޕް ކާމިޔާބުކޮށްފަ އެވެ. މިދިޔަ އަހަރުގެ ފައިނަލްގައި އެ ޓީމުން ވަނީ ރެއާލް ބަލިކޮށްފަ އެވެ. ބާސެލޯނާ އަކީ މި މުބާރާތުގެ އެންމެ ކާމިޔާބު ޓީމެވެ. އެ ޓީމުން ވަނީ 14 ފަހަރު މުބާރާތް ކާމިޔާބުކޮށްފަ އެވެ.
