ބާސެލޯނާ އިން ނިކުންނާނީ ސްޕެނިޝް ސުޕަ ކަޕް ކާމިޔާބު ކުރަން ކަމަށް، އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ޒަވީ މިހެން ބުނީ، ސްޕެނިޝް ސުޕަ ކަޕްގެ ސެމީ ފައިނަލްގައި ބާސެލޯނާ އިން އޮސަސޫނާއާ ދެކޮޅަށް ނިކުންނަ މެޗުގެ ކުރިން ނޫސްވެރިންނާ ވާހަކަ ދައްކަމުންނެވެ. ބާސެލޯނާ އަކީ މުބާރާތުގެ އެންމެ ފަހުގެ ޗެމްޕިއަނުންނެވެ. އެހެންކަމުން، މިއަހަރު ވެސް އެ ޓީމު ނިކުންނާނީ ސީދާ ތައްޓަަށް އަމާޒު ހިފައިގެން ކަމުގައި ޒަވީ ވަނީ ބުނެފަ އެވެ. އަދި ޒަވީ ބުނު ގޮތުގައި، އެއްވެސް ތައްޓަކީ ބާސެލޯނާ އަށް ކުޑަ ތައްޓެއް ނޫނެވެ. ޒަވީ ބުނީ މިދިޔަ ސީޒަންގައި ބާސެލޯނާ އިން ދެ ތަށި ކާމިޔާބު ކުރިއިރު، އޭގެ ތެރެއިން އެއް ތައްޓަކީ ސުޕަ ކަޕް ކަމަށެވެ.
އިތުރަށް އޭނާ ބުނީ، މިދިޔަ ސީޒަންގައި ބާސެލޯނާ އިން ސުޕަ ކަޕް ކާމިޔާބު ކުރީ އާދަޔާ ޚިލާފު ހިތްވަރެއްކޮށް، މޮޅަށް ކުޅެގެން ކަމަށެވެ. ޚާއްސަކޮށް، މިދިޔަ އަހަރު މުބާރާތުގެ ފައިނަލް މެޗުގައި ބާސެލޯނާގެ ކުޅުންތެރިން ވަރަށް މޮޅަށް ކުޅުނުކަމަށް އޭނާ ވަނީ ބުނެފަ އެވެ. އެހެންކަމުން، އަނެއްކާ މިއަހަރު ވެސް އެ ކާމިޔާބޫ ތަކުރާރު ކުރަން ބޭނުންވާ ކަމުގައި ޒަވީ ވަނީ ބުނެފަ އެވެ. އޭނާ ފާހަގަ ކުރި ގޮތުގައި އެ މުބާރާތުގެ ތަށި ކާމިޔާބު ކުރުމަކީ ވެސް ވަރަށް މުހިންމު ކަމެކެވެ. ނަމަވެސް، އެއީ ސްޕެނިޝް ލީގު ނުވަތަ ޔުއެފާ ޗެމްޕިއަންސް ލީގު ކާމިޔާބު ކުރުންހާ ބޮޑު ކަމަކަށް ނުވެދާނެކަމުގައި އޭނާ ބުންޏެވެ.
އޭނާ ބުނީ މުބާރާތުގެ ފައިނަލަށް ގޮސް، ތަށި ކާމިޔާބު ކުރަން ބޭނުންވާއިރު، އެކަން ކުރަން ޖެހޭނީ ފަހަރަކު ފިޔަވަޅަކުން ކަމަށެވެ. ފައިނަލްގެ ކުރިން ސެމީ ފައިނަލްގައި އޮސަސޫނާ ބަލިކުރަން ޖެހޭ ކަމަށް ޒަވީ ބުންޏެވެ. އޮސަސޫނާއާ ގުޅޭ ގޮތުން ޒަވީ ބުނީ، އެ ޓީމު އެންމެ ފަހުން ކުޅުނު މެޗުތަކުގައި ފެނުނީ، ވަރަށް ބޮޑަށް އިދިކޮޅު ޓީމުތަކަށް ނުރައްކާ ކޮށްގެން ކުޅުނު މަންޒަރު ކަމަށެވެ. އެހެންކަމުން، އޮސަސޫނާ އަކީ ބާސެލޯނާ އިން ވަރަށް ބޮޑަށް ސަމާލުކަން ދޭން ޖެހޭނެ ޓީމެއްކަން އޭނާ ފާހަގަ ކުރި އެވެ.
މުބާރާތުގެ ސެމީ ފައިނަލްގައި ބާސެލޯނާ އިން އޮސަސޫނާއާ ދެކޮޅަށް ނިކުންނާނީ ބުރާސްފަތި ދުވަހުގެ ރޭ ދަންވަރު 12 ޖަހާއިރު އެވެ. އެ މެޗުން މޮޅު ޓީމެއް ފައިނަލްގައި ނިކުންނަން ޖެހޭނީ، ރެއާލް މެޑްރިޑާ ދެކޮޅަށެވެ.
