މިހާރު ރާއްޖެ އާއި އިންޑިއާއާ ދެމެދު ދިމާވެފައިވާ މައްސަލަ އަށް ދެ ޤައުމު ގުޅިގެން ހައްލު ހޯދޭނެ ކަމާ މެދު ޝައްކު ނުކުރައްވާ ކަަމަށް ޚާރިޖީ ދާއިރާ އަށް ގިނަ ޚިދުމަތްތަކެއް ކޮށްދެއްވާފައިވާ ޑރ. ފަރަހަނާޒް ފައިސަލް ވިދާޅުވެއްޖެއެވެ.
ޑރ. ފަރަހަނާޒް އަކީ ރާއްޖެއިން އިނގިރޭސިވިލާތަށް ކަނޑައަޅާފައިވާ ސަފީރުކަމާއި، ފްރާންސް، ސްޕެއިން، ޑެންމާކް އަދި ފިންލޭންޑް ފަދަ ޤައުމުތަކަށް ރާއްޖެ އިން ކަނޑައަޅާފައިވާ ސަފީރުގެ މަޤާމު އަދާކުރައްވާފައިވާ ބޭފުޅެކެވެ. އެކްސްގައި އޭނާ ކުރެއްވި ޕޯސްޓެއްގައި ވިދާޅުވީ ރާއްޖެ އަކީ ކުޑަ ޤައުމަކަށްވެފައި އިންޑިއާއަކީ ބިޔަ ޤައުމެއް ކަމަށް ވިޔަސް، ދެ ޤައުމުގެ ދެމެދުގައި އޮތް ގުޅުމަކީ ޒަމާންތަކަކަށް ދެމިގެން ގޮސްފައިވާ ގާތް ގުޅުމެއް ކަމަށެވެ.
އަދި އަދުގެ ސަރުކާރުގެ އިސް ބަޔަކު އިންޑިއާގެ ބޮޑުވަޒީރަށް އިޙުތިރާމް ކުޑަވާގޮތަށް ވާހަކަދައްކާފައިވާ ކަަމަށާއި އެ މީހުންނާ މެދު ފިޔަވަޅު އަޅާފައިވާ ކަމަށް އޭނާ ވިދާޅުވިއެވެ. އެހެންކަމުން ދެ ގައުމު ގުޅިގެން މި މައްސަލަ ހައްލުކުރެވޭނެ ކަމަށް ޤަބޫލުކުރައްވާ ކަމަށް ޑރ.ފަރަހަނާޒް ވިދާޅުވިއެވެ.
އިންޑިއާގެ ބޮޑުވަޒީރާއި އިންޑިއާ އަށް އިޙުތިރާމްކުޑަވާ ގޮތަށް ރާއްޖޭގެ ނާއިބު ވަޒީރުންތަކެއް ވާހަކަދެއްކި މައްސަލަ ހޫނުވެ އެ ނައިބު ވަޒީރުން މިހާރު ވަނީ ވަޒީފާ އިން ސަސްޕެންޑުކޮށްފައިކަމަށް ސަރުކާރުން ވަނީ ބުނެފައެވެ.
