ރައްޔިތުން މަޖިލިސް އިންތިޚާބު ބާއްވާނެ ތާރީޚެއް ކަނޑައެޅުމާމެދު ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ފޮނުވި ސިޓީއާ ގުޅޭގޮތުން މަޝްވަރާކުރުމަށްފަހު މި ހަފްތާގައި އިއުލާންކުރައްވާނެ ކަމަށް އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު ވިދާޅުވެއްޖެއެވެ.
އާދިއްތަ ދުވަހު އިލެކްޝަންސް ކޮމިޝަން (އީސީ)އިން ބޭއްވި ނޫސްވެރިންގެ ބައްދަލުވުމެއްގައި ހަބީބު ވިދާޅުވީ މަޖިލިސް އިންތިޚާބު ބާއްވާނެ ތާރީޚު ކަނޑައެޅުމާ ގުޅޭގޮތުން އެ ކޮމިޝަނުން ގިނަ މަޝްވަރާތަކެއް ކޮށްފައިވާ ކަމަށާއި، ސިޔާސީ ޕާޓީތަކުގެ ޚިޔާލު ވެސް ހޯދަމުންދާ ކަމަށެވެ. މިނޫސްވެރިންގެ ބައްދަލުވުމުގައި ތަރީޚު އިއުލާންކުރަން ނިންމި ނަމަވެސް މިދިޔަ ބުރާސްފަތި ދުވަހު އެމްޑީޕީގެ ފަރާތުން ކޮމިޝަނަށް ސިޓީއެއް ލިބިފައިވާ ކަމަށާއި، އެކަމާއި ގުޅޭގޮތުން އެމްޑީޕީއާއެކު މަޝްވަރާ ކުރުމަށްފަހު ކޮމިޝަނަށް ފެންނަ އެންމެ ރަނގަޅުގޮތް އާއްމު ކުރައްވާނެ ކަމަށް ހަބީބު ވިދާޅުވިއެވެ.
ހަބީބު ވިދާޅުވީ މަޖިލިސް އިންތިޚާބު ބާއްވާނެ ތަރީޚެއް ކަނޑައެޅުމުގައި ކޮމިޝަނުން ވަރަށް ގިނަ ކަންކަމަށް ބަލާނެ ކަމަށެވެ. އެގޮތުން ރައްޔިތުންނާއި، ކެންޑިޑޭޓުން ފަސޭހަ ގޮތެއް ވެސް ބަލާނެ ކަމަށް ހަބީބު ވިދާޅުވިއެވެ. އަދި ވިދާޅުވީ އިންތިޚާބު ބާއްވާއިރު ކޮމިޝަނަށް ހުރި ގޮންޖެހުންތަކާއި، އެންމެ ރަނގަަޅަށް އިންތިޒާމްތައް ބައްޓަން ކުރެވޭނެ ހާލަތަށް ވެސް ބަލާނެ ކަމަށެވެ.
ރައްޔިތުން މަޖިލީހު އިންތިޚާބުގެ ތަރީހު ކަނޑައެޅުމަށްޓަކައި ހަގީގަތުގައި މިއަދު އިއުލާން ކުރާ ގޮތަށް ނިންމައިގެން އައީ. ނަމަވެސް ރާއްޖޭގެ ސިޔާސީ ޕާޓީތަކުގެ ތެރެއިން އެންމެ ބޮޑު ސިޔާސީ ޕާޓީން އިލެކްޝަން ކޮމިޝަނަށް ސިޓީއެއް ވެސް މިދިޔަ ބުރާސްފަތި ދުވަހުގެ 1:51 ގައި ކޮމިޝަނަށް ފޮނުވާފައި އޮތީ. އެސިޓީ ފޮނުވުމާއި ގުޅިގެން ކޮމިޝަނުގައި މިއަދު މަޝްވަރާ ކޮށްފައި މިއައީ. އެކަމާއި ގުޅޭގޮތުން އެމްޑީޕީއާ މަޝްވަރާ ކުރުމަށްފަހު އަޅުގަނޑުމެންގެ ޑެސިޝަން މިހަފްތާގެ ތެރޭގައި އާއްމު ކުރާނަން. ލަސްނުކޮށް އެކަންދާނެ.އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު
ހަބީބު ވިދާޅުވީ ރިޔާސީ އިންތިޚާބުގައި ވޯޓުލާ މިންވަރަށް، މަޖިލިސް އިންތިޚާބުގައި ވޯޓު ނުލާ ކަމަށެވެ. އަދި ކައުންސިލްތަކުގެ އިންތިޚާބުގައި ވޯޓުލާ މިންވަރު ވެސް މަދު ކަމަށް ހަބީބު ވިދާޅުވިއެވެ. ހަބީބު ވިދާޅުވީ އިންތިޚާބު ރޯދަމަހަށް ދިމާވެއްޖެނަމަ ވޯޓުލުމަށް ނުކުންނަ މީހުންގެ އަދަދު މަދުވުމަކީ އެކަށީގެންވާ ކަމެއް ކަމަށެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި އީސީން އެދިފައިވަނީ މަޖިލިސް އިންތިޚާބުގެ ތާރީޚު ކަނޑައެޅުމަކީ ކޮމިޝަނުގެ ކަމެއްގެ ގޮތުގައި ކޮމިޓީން ނިންމާ ދިނުމަށެވެ. އެގޮތުން އިންތިޚާބު ފަސްކުރާނަމަ މައްސަލަތައް ދިމާވާ ކަމަށާއި، އެހެންކަމުން އަދި ދުވަހެއް ކަނޑަނާޅާކަމަށް އީސީގެ ރައީސް ވިދާޅުވެފައިވެއެވެ.
މަޖިލިސް އިންތިޚާބުގެ ވޯޓުލުން ރޯދަމަހަށްފަހު ބާއްވަން އީސީއަށް ހުށަހެޅުމަށް، ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީން ފާސްކޮށްފައިވަނީ 26 ނޮވެންބަރު 2023 ވީ އާދިއްތަ ދުވަހެވެ.
