ރާވައިގެން ކުރާ ބޮޑެތި ކުށްތަކާ ދެކޮޅަށް މަސައްކަތް ކުރުމަށްޓަކައި ބްރެޒިލްގެ ސްޓޭޓެއްް ކަމަށްވާ ރިއޯ ޑި ޖެނޭރޯ ގެ މަގުތަކަށް 10,000 ސިފައިން ނެރުމުގެ މަސައްކަތް ފަށައިފިއެވެ.

މިގޮތުން ރިއޯ ޑި ޖެނޭރޯ ގެ މަގުތަކަށް ވަނީ ހުކުރު ދުވަހު 8,500 ސިފައިން ނެރެފައެވެ. ރިޕޯޓުތައް ބުނާ ގޮތުން އެ ސިފައިންނަށް އެހީވުމަށް ފުލުހުންނާއި އަދި ޕެޓްރޯލް އޮފިސަރުން ވެސް ބައިވެރިވާނެއެވެ. 

ގާތްގަނޑަކަށް މީގެ އަހަރެއްހާ ދުވަސްކުރިން  ރިއޯ ޑި ޖެނޭރޯ ގައި އޮލިމްޕިކްސް ކުޅިވަރު މުބާރާތް ނިމުނު ފަހުން ހަމަނުޖެހުންތައް ވަނީ އިތުރުވާން ފަށާފައެވެ. މިއަހަރުގެ މިހާތަނަށް އެ ސްޓޭޓުގައި ހިނގި ހަމަނުޖެހުންތަކުގައި ވަނީ 90 ފުލުހުން މަރުވެފައެވެ.

ބްރެޒިލްގެ ޑިފެންސް މިނިސްޓަރު ވިދާޅުވީ ރިއޯ ޑި ޖެނޭރޯ ސްޓޭޓުގެ މަގުތަކަށް ނެރުނު ސިފައިން އިންޓެލިޖެންސް އޮޕަރޭޝަންސްތައް ހިންގާނެ ކަމަށާއި, ޑްރަގް ޓްރެފިކިން އަދި އެހެނިހެންވެސް ކުށްތަކާއި ދެކޮޅަށް އޮޕަރޭޝަންސްތައް ހިންގާނެ ކަމަށެވެ.

ބްރެޒިލްގެ ރައީސް މިޝެލް ޓެމާ ނެރުއްވި ގަރާރަކުން ސިފައިންނަށް ރިއޯ ޑި ޖެނޭރޯ ސްޓޭޓުގައި މިއަހަރު ނިމެންދެން ހަރަކާތްތެރި ވެވޭނެއެވެ.