އިޓާލިއަން ލީގުގައި ނަޕޯލީއާ ދެކޮޅަށް ކުޅުނު މެޗުން މޮޅުވެ، ޔުވެންޓަސް އަނެއްކާވެސް އެއްވަނައަށް ޖެހިލައިފިއެވެ.

އިޓާލިއަން ލީގުގައި ހުކުރު ދުވަހުގެ ރޭ ޔުވެންޓަސްގެ ދަނޑުގައި ކުޅުނު މެޗުން އެ ޓީމު މޮޅުވީ 1-0ންނެވެ. މެޗުގެ ފުރަތަމަ ހާފުގައި ދެ ޓީމަށްވެސް ލަނޑު ޖަހާނެ ފުރުސަތު ލިބުނެވެ. ނަމަވެސް އެއްވެސް ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. މެޗުގެ ހަމައެކަނި ލަނޑު ޔުވެންޓަސްއިން ޖެހީ ދެވަނަ ހާފު ފަށައިގެން ހަވަނަ މިނިޓުގައެވެ. އެންޑްރިއާ ކަމްބިއާސޯ ތަނަވަސްކޮށްދިން ފުރުސަތެއްގައި އެ ލަނޑު ޖެހީ ފެޑެރިކޯ ގަޓީއެވެ.

މޮޅާއެކު ޔުވެންޓަސް އެއް ވަނައަށް ޖެހިލީ، މިހާތަނަށް ކުޅުނު 15 މެޗުން 36 ޕޮއިންޓު ހޯދައިގެންނެވެ. އެ ޓީމަށްވުރެ އެއް މެޗު މަދުން ކުޅެގެން ދެވަނާގައި އޮތް އިންޓަ މިލާނަަށް ލިބެނީ 35 ޕޮއިންޓެވެ. މެޗުގެ އަދަދު ހަމަކޮށްގެން އެއްވަނައަށް އެރުމުގެ ފުރުސަތު އިންޓައަށް އޮންނާނެއެވެ. އަނެއްކޮޅުން މިއީ މި ސީޒަންގެ އިޓާލިއަން ލީގުގައި އެންމެ ފަހުގެ ޗެމްޕިއަން ނަޕޯލީ ބަލިވި ފަސް ވަނަ މެޗެވެ. 15 މެޗުން 24 ޕޮއިންޓާއެކު ނަޕޯލީ އޮތީވެސް ފަސް ވަނާގައެވެ.