ސައޫދީ ޕްރޯ ލީގުގައި އަލްފައިޙާއާ ދެކޮޅަށް ކުޅުނު މެޗުން މޮޅުވެ، އައްތަޢާވުން ލީގު ތާވަލްގެ ތިންވަނައަށް ޖެހިލައިފިއެވެ.

އަލްފައިޙާއާ ދެކޮޅަށް ކުޅުނު މެޗުން އައްތަޢާވުންއިން ކާމިޔާބުކުރީ 4-1ންނެވެ. މެޗުގައި ފުރަތަމަ ލަނޑުޖަހައި ކުރި ހޯދީވެސް އަލްފައިޙާއިންނެވެ. ނަމަވެސް، އައްތަޢާވުންއިން ވަނީ ފަހަތުން އަރައި ހަތަރު ލަނޑު ޖަހައިގެން މެޗު ކާމިޔާބު ކޮށްފައެވެ.

މެޗު ފަށައިގެން ހަވަނަ މިނެޓުގައި އަލްފައިޙާއަށް ލީޑު ނަގައިިދިނީ ފެޝިއޮން ސަކަލާއެވެ. އޭގެ ފަހުން މެޗުގެ 15 ވަނަ މިނެޓުގައި އައްތަޢާވުންއަށް ނަތީޖާ ހަމަހަމަކޮށްދިނީ މަތެއުސް ކަސްޓްރޯއެވެ. ފުރަތަމަ ހާފުގެ 40 ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް، އައްތަޢާވުންއަށް ލީޑު ނަގައިދިނީ އަޝްރަފް އަލްމަހްދީއެވެ. އައްތަޢާވުނުގެ އަނެއް ދެ ލަނޑު އެ ޓީމުން ޖެހީ ދެވަނަ ހާފުގައެވެ. މެޗުގެ 62 ވަނަ މިނެޓުގައި އެ ޓީމުގެ ތިންވަނަ ލަނޑު ޖެހީ މުސާ ބެރޯއެވެ. އައްތަޢާވުނުގެ ފަހު ލަނޑު 84 ވަނަ މިނެޓުގައި ޖެހީ، ޢަބްދުލް ފައްތާޙު އާދަމް އަޙުމަދު މުޙައްމަދުއެވެ.

މޮޅާއެކު އައްތަޢާވުން ތިންވަނާގައި އޮތީ މިހާތަނަށް ކުޅުނު 16 މެޗުން 31 ޕޮއިންޓާއެކުއެވެ. އެ ޓީމުގެ ކުރިން ދެވަނާގައި އޮތް އައްނަސްރާ ދެމެދު އޮތީ ހަ ޕޮއިންޓުގެ ފަރަޤެކެެވެ. އައްތަޢާވުނުގެ ފަހަތުން ހަތަރުވަނާގައި އަލް އަހްލީ ސަޢޫދީއަށް 30 ޕޮއިންޓު ލިބެނީ، އެއް މެޗު މަދުން ކުޅެގެންނެވެ. ނަމަވެސް، މެޗުގެ އަދަދު ހަމަކޮށްގެން އެ ޓީމަށް ތިންވަނައަށް ޖެހިލެވޭނެއެވެ.