ސައުދީ ޕްރޯ ލީގުގައި އަލް ހަޒްމާ ދެކޮޅަށް ކުޅުނު މެޗުން މޮޅުވެ، އަލް ހިލާލުން ލީގު ތާވަލްގެ އެއް ވަނަ މަގާމު ދަމަހައްޓައިފި އެވެ.

މި ސީޒަންގެ ލީގުގައި މޮޅަށް ކުޅެމުން އަންނަ އަލް ހިލާލް، އަލް ހަޒްމު އަތުން މޮޅުވީ ނުވަ ލަނޑުންނެވެ. މެޗުގައި އަލް ހިލާލްގެ ލަނޑުތައް ޖެހީ އެލެކްސެންޑާ މިޓްރޮވިޗް، މުޙައްމަދު ކަންނޯ، މުޙައްމަދު އަލް ޤަހްތާނީ، މަލްކޮމް، ސަލީހް އަލް ޝެހްރީ، މުޙައްމަދު އަލް ބުރައިކް އަދި ސާޖެޖް މިލިންކޮވިޗް ސަވިޗް އެވެ. މީގެ ތެރެއިން މަލްކޮމް ވަނީ މެޗުގައި ދެ ލަނޑު ޖަހައިފަ އެވެ. އަނެއްކޮޅުން އެ ޓީމުގެ ފުރަތަމަ ލަނޑު ޖެހި ސާބިއާގެ ފޯވާޑް މިޓްރޮވިޗް އަންނަނީ މޮޅު ކުޅުމެއް ދައްކަމުންނެވެ. ފުލަމް ދޫކޮށް އަލް ހިލާލަށް ބަދަލުވެ އޭނާ ވަނީ މިހާތަނަށް އެ ކުލަބަށް ކުޅެދިން 18 މެޗުން 18 ލަނޑު ޖަހައިފަ އެވެ. އޭގެ ތެރެއިން 11 ލަނޑަކީ ސައުދީ ލީގުގައި އޭނާ ޖެހި ލަނޑެވެ.

މޮޅާއެކު އަލް ހިލާލް އެއް ވަނައިގައި އޮތީ ހަތަރު ޕޮއިންޓުގެ ލީޑަކުންނެވެ. މިހާތަނަށް ލީގުގައި ކުޅުނު 14 މެޗުން އެ ޓީމު ވަނީ 38 ޕޮއިންޓު ހޯދައިފަ އެވެ. އެ ޓީމުގެ ފަހަތުން ދެ ވަނައިގައި އޮތް އަލް ނަސްރަށް ލިބެނީ 14 މެޗުން 34 ޕޮއިންޓެވެ. ތިން ވަނައިގައި އަލް އަހްލީ ސައުދީ އަށް ލިބެނީ 27 ޕޮޮއިންޓެވެ. ހަތަރު ވަނައިގައި އޮތް އެންމެ ފަހުގެ ޗެމްޕިއަން އަލް އިއްތިހާދަށް ލިބެނީ 25 ޕޮއިންޓެވެ.