ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ އަށް އަނިޔާވެ، ކުޅުމާ ދުރަށް ދާން ޖެހިއްޖެ އެވެ.
އޭނާ އަށް އަނިޔާވެފައި ވަނީ ފީފާ ވޯލްޑް ކަޕް ކޮލިފިކޭޝަންގައި އެންމެ ފަހުން ބްރެޒިލުން ކޮލަމްބިއާއާ ދެކޮޅަށް ކުޅުނު މެޗުގަ އެވެ. އެ މެޗުގައި ލިބުނު އަނިޔާގެ ސަބަބުން މެޗުގެ ފުރަތަމަ ހާފުގައި އޭނާ ވަނީ ބަދަލުކޮށްފަ އެވެ.
އެ މެޗަށްފަހު ކުރިއަށް ގެންދިޔަ ވިނީޝިއުސްގެ ޓެސްޓުތަކުން ދައްކާ ގޮތުގައި އޭނާގެ ފައިގެ ފަލަމަސްގަނޑަށް ވަނީ އަނިޔާވެފަ އެވެ. އެ އަނިޔާގެ ސަބަބުން ގާތް ގަނޑަކަށް ދެ މަސް ދުވަސް ނުވަތަ ދެ މަހާ ބައި ވަންދެން އޭނާ ކުޅުމާ ދުރުގައި ހުންނަން ޖެހޭނެ ކަމަށް ރެއާލުން ނެރުނު ބަޔާނެއްގައި ވަނީ ބުނެފަ އެވެ. އެކަން ބިނާވެގެން ދާނީ ވިނީޝިއުސްގެ ރިކަވަރީ ކުރިއަށްދާ ގޮތެއްގެ މައްޗަށެވެ. މި ސީޒަންގައި ވެސް ރެއާލްގައި މޮޅަށް ކުޅެމުން އަންނަ ވިނީޝިއުސް އަށް އަނިޔާވުމަކީ، އެ ޓީމަށް ކުރިމަތިވާނެ ގޮންޖެހުމެކެވެ. ވިނީޝިއުސް ވަނީ މި ސީޒަންގެ މިހާތަނަށް ރެއާލަށް ކުޅެދިން 13 މެެޗުން ހަ ލަނޑު ޖަހައިފަ އެވެ.
ވިނީޝިއުސް އަށް އަނިޔާވުމުން ރެއާލްގައި އަނިޔާގެ މައްސަލަ ވަނީ ބޮޑުވެފަ އެވެ. ވިނީޝިއުސް އާއެކު މިހާރު އަނިޔާގައި ތިބީ އެ ޓީމުގެ އެއް ނަންބަރު ގޯލް ކީޕަރު ތިބައޫ ކޯޓުއާ، އެޑާ މިލިޓާއޯ، ޖޫޑް ބެލިންހަމް އަދި އެޑުއާޑޯ ކަމަވިންގާ ފަދަ ކުޅުންތެރިންނެވެ.
