ބޮލީވުޑްގެ މަޝްހޫރު ތަރި އަމީތާބް ބައްޗަންގެ ޓްވީޓާ އެކައުންޓަށް 28 މިލިއަން ފޮލޯވާސް ލިބިއްޖެއެވެ.
އަމީތާބަށް މިހާ ގިނަ އަދަދެއްގެ ފޮލޯވާސް ލިބުމުން އޭނާގެ ސަޕޯޓަރުން ދަނީ އޭނާއަށް މަރުހަބާ ކިޔަމުންނެވެ. އެގޮތުން އޭނާ ވަނީ އެކަމަށް ޓްވީޓް ކޮށްފައެވެ. އަމީތާބް ބުނީ އޭނާ ފޮލޯ ކުރި އެންމެނަށް ޝުކުރު އަދާކުރާ ކަމަށެވެ. އޭނާ ދެން ދެކެން ބޭނުން ވަނީ 30 މިލިއަން ފޮލޯވާސް ކަމަށާއި އެ އަދަދު ވެސް ދާދި އަވަހަކަށް ހަމަވާނެ ކަމަށް ބުނެފައި ވެއެވެ.
އަމީތާބް މިހާރު ދަނީ އިންޑިއާގެ އެންމެ ބޮޑު އެއް ޝޯ ކަމަށްވާ "ކޭބީސީ" އަށް ތައްޔާރު ވަމުންނެވެ. އަންނަ އޮގަސްޓް މަހު ފަށާ މި ޝޯގައި މިހާރު ވަނީ އެތައް މިލިއަން މީހުންނެއް ބައިވެރިވެފައެވެ.
ހިންދީ ފިލްމީ މަސްރަހަށް އަމީތާބް ތަޢާރަފްވެގެން ދިޔައީ 1969 ވަނަ އަހަރު ނިކުތް ޑައިރެކްޓަރ ކޭއޭ އައްބާސްގެ "ސާތު ހިންދުސްތާނީ" އެވެ. އަމީތާބް މަޝްހޫރުވެފައިވާ ފިލްމަކީ 1971 ވަނަ އަހަރު ނިކުތް "އާނަންދު" ންނެވެ. އަމީތާބް އުފަންވެފައި ވަނީ އޮކްޓޯބަރ 11، 1942 ވަނަ އަހަރުއެވެ.
