ޗެލްސީގެ ދަނޑަށް ޓޮޓެމްހަމްގެ ކުރީގެ ކޯޗު މައުރީސިއޯ ޕޮޗެޓީނޯ އެނބުރި އަންނައިރު އޭނާ އަށް އިހްތިރާމް ދިނަސް ގާޑްއޮޕް އޮނާއެއް ނުދޭނެ ކަމަށް ކޯޗު އެންޖޭ ޕޮސްޓެކޮގްލޫ ބުނެފި އެވެ.

ޗެލްސީ އާއި ޓޮޓެންހަމް މާދަމާ ކުޅޭ މެޗަކީ ހަތަރު އަހަރާއި ބަޔަށް ފަހު ޓީމު ދޫކޮށްދިޔަ ފަހުން ޓޮޓެމްހަމާ ދެކޮޅަށް ޕޮޗެޓީނޯ ނުކުންނަ ފުރަތަމަ ފަހަރެވެ.

ޕޮޗެޓީނޯ ވަނީ އޭނާގެ ކޯޗުކަމުގައި ޕްރެމިއާ ލީގުގެ ގަދަ ހަތަރެއްގެ ތެރޭގައި ޓޮޓެންހަމް ބާއްވައިދީ ޗެމްޕިއަންސް ލީގު ފުޓްބޯޅަ މުބާރާތުގެ ފައިނަލްގައި ވެސް ކުޅެފަ އެވެ. މިހެންވެ އޭނާ އަށް ސަޕޯޓަރުންގެ މެދުގައި ވަރަށް ބޮޑު މަގުބޫލުކަމެއް އެބައޮތެވެ. އޭނާ އަށް ފަހު ޓީމާ ހަވާލުވި އެއްވެސް ކޯޗަކަށް ޓޮޓެމްހަމް ހަމަޔަކަށް އަޅުވާނުލެވި ނަތީޖާ ދިޔައީ ދަށަށެވެ. ނަމަވެސް ޕޮސްޓެކޮގްލޫ ހަވާލުވިފަހުން މި ސީޒަނުގައި ޓޮޓެމްހަމް ދަނީ ލީގަށް ވާދަކުރަން ފަށައިފަ އެވެ.

މާދަމާގެ މެޗާ ބެހޭ ގޮތުން ވާހަކަ ދައްކަމުން ޕޮސްޓެކޮގްލޫ ބުނީ ޕޮޗެޓީނޯއާއެކު މަސައްކަތް ކުރި މީހުން ޓޮޓެންހަމުގައި އަދިވެސް އެބައޮތް ކަމަށާއި އެއިން ކޮންމެ މީހެއްގެ ހިތުގައި ވެސް އޭނާ އަށް އޮތީ އިހްތިރާމް ކަމަށެވެ.

މި ވަގުތު ޓޮޓެންހަމް އޮތީ 26 ޕޮއިންޓާއެކު ލީގު ތާވަލުގެ އެއްވަނާގަ އެވެ. ޗެލްސީ އޮތީ ކޮންމެ ޓީމެއް 10 މެޗު ކުޅުނުއިރު 12 ޕޮއިންޓާއެކު 11 ވަނާގަ އެވެ.