ސައުދީ ޕްރޯ ލީގުގައި އަލް ފެއިހާއާ ދެކޮޅަށް ކުޅުނު މެޗުން މޮޅުވެ، ލީގު ތާވަލްގެ ދެ ވަނަ އަށް އަލް ނަސްރު ޖެހިލައިފި އެވެ.

ލީގުގައި ހޮނިހިރު ދުވަހުގެ ރޭ އަލް ފެއިހާއާ ދެކޮޅަށް ކުޅުނު މެޗު އަލް ނަސްރުން ކާމިޔާބު ކުރީ 3-1 އިންނެވެ. މެޗުގައި ދެ ޓީމުން ވެސް ލަނޑު ޖަހާފައި ވަނީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ފަސް ވަނަ މިނެޓުގައި ބްރެޒިލްގެ ޓަލިސްކާ ވަނީ ލަނޑު ޖަހައި އަލް ނަސްރަށް ލީޑު ނަގައިދީފަ އެވެ. އޭގެ ފަހުން 61 ވަނަ މިނެޓުގައި ޓަލިސްކާ ވަނީ އިތުރު ލަނޑެއް ޖަހައި އެ ޓީމަށް ލީޑު ފުޅާ ކޮށްދީފަ އެވެ. އޭގެ ފަސް މިނެޓު ފަހުން ޙުސެއިން އަލް ޝުވައިޝް ވަނީ ލަނޑެއް ޖަހާ އަލް ފެއިހާ އަށް ފަރަގު ކުޑަ ކޮށްދީފަ އެވެ. މެޗުން އަލް ނަސްރަށް ފުރިހަމަ މޮޅެއް ލިބުނީ 74 ވަނަ މިނެޓުގައި އޮޓާވިއޯ ޖެހި ލަނޑުންނެވެ.

މޮޅާއެކު އަލް ނަސްރު ވަނީ ލީގު ތާވަލްގެ ދެ ވަނަ މަގާމަށް ޖެހިލައިފަ އެވެ. އެއީ މިހާތަނަށް ކުޅުނު 11 މެޗުން 25 ޕޮއިންޓު ހޯދައިގެންނެވެ. އެއް ވަނައިގައި އޮތް އަލް ހިލާލާ ދެމެދު އޮތީ ހަތަރު ޕޮއިންޓުގެ ތަފާތެކެވެ. އެ ޓީމަށް އެއް ވަނައިގައި 11 މެޗުން ލިބެނީ 29 ޕޮއިންޓެވެ.