މޯލްޑިވްސް މެޖިޝަން އެސޯސިއޭޝަންގެ ރައީސް އަހުމަދު ޝަރީފް، ތައިލެންޑުގައި އޮންނަ މެޖިކް ކޮންވެންޝަނަކަށް ފުރާވަޑައިގެންފިއެވެ.
މި ކޮންވެންޝަން ކުރިއަށްދާނީ ތައިލެންޑުގެ ބެންކޮކް ސިޓީގައި، 300 އެއްހާ މެމްބަރުން ހިމެނޭގޮތަށެވެ. މި ކޮންވެންޝަނަކީ ކޮންމެ އަހަރަކުވެސް ބެންކޮކުގައި ބާއްވަމުންގެންދާ ކޮންވެންޝަންއެކެވެ.
މި ކޮންވެންޝަނުގައި މެޖިކުގެ އިތުރުން ޝަރީފްގެ ބަބްލްސް އިވެންޓެއް ކުރިއަށް ގެންދިއުމަށް ހަމަޖެހިފައިވާކަމަށް އޭނާ ވިދާޅުވިއެވެ. އެގޮތުން، ހަވީރުގެ ކިޑްސް ޕާޓީއެއްގައި ވަރަށް ކުލަގަދަ ގޮތެއްގައި މި އިވެންޓް ބޭއްވޭނެކަން އޭނާ ވަނީ ފާހަގަކުރައްވާފައެވެ. މިފަދަ އިވެންޓެއް ބޭއްވިގެން ދިއުމަކީ ޝަރީފަށްވެސް އަދި ދިވެހިރާއްޖެއަށް ވެސް ލިބިގެންދާނެ ވަރަށް ބޮޑު ފަޚުރެއްކަން އޭނާ ވަނީ ފާހަގަކުރައްވާފައެވެ.
މީގެއިތުރުން، މިފަހަރުގެ ކޮންވެންޝަނުންވެސް ރަނގަޅު ކާމިޔާބީއެއް ހޯއްދެވޭނެކަމަށް ޝަރީފް ވަނީ ބުނެފައެވެ.
ޝަރީފަކީ ޖާދޫ ހެއްދެވުމުގެ މަސައްކަތުގައި 23 އަހަރު ހޭދަކުރައްވާފައިވާ، ކާމިޔާބު ޖާދޫގަރެކެވެ. އެގޮތުން، ބޭރުގެ ތަފާތު ގައުމުތަކުގައި ގިނަ ޝޯތަކެއް ދެއްވައި، އޭނާ ވަނީ ކާމިޔާބު ވަނަތަކެއްވެސް ހޯއްދަވާފައެވެ. މީގެއިތުރުން، އޭނާ ވަނީ މާލެއާއި ރާއްޖެތެރޭގެ އެކި ހަފްލާތަކުގައިވެސް ޝޯތައް ހުށަހަޅުއްވާފައެވެ.
