ވިލިމާލެ ދާއިރާގެ ކުރީގެ މެންބަރު އަހުމަދު ނިހާން ހުސައިން މަނިކުގެ އެޕާޓްމަންޓެއް ވިއްކާލުމުގެ ހުއްދަ ސިވިލް ކޯޓުން މޯލްޑިވްސް އިސްލާމިކް ބޭންކް (އެމްއައިބީ) އަށް ދީފިއެވެ.

މި މައްސަލައަކީ ހުޅުމާލޭ، ޕްލެޓިނަމް ރެސިޑެންސްގެ އެޕާޓްމެންޓެއް ރަހުނުކޮށް އެމްއައިބީ އިން ނިހާން ނަންގަވާފައިވާ ލޯނެއް ދައްކަވަމުން ނުގެންދެވުމާއި ގުޅިގެން، އެމްއައިބީއިން ސިވިލް ކޯޓަށް ހުށަހެޅި މައްސަލައެކެވެ.

މި މައްސަލައިގައި ސިވިލް ކޯޓުގައި އިސްލާމިކް ބޭންކުން އެދިފައިވަނީ އެ ބޭންކުން ނިހާނަށް ދީފައިވާ 4،023،314.49 މިލިއަން ރުފިޔާގެ ފެސިލިޓީއާއި، ބޭންކަށް ފައިސާ ނުދެއްކުމާއި، ފެސިލިޓީއަށް ދައްކަން ޖެހޭ އެންމެހައި ފައިސާއާއި މަހުން މަހަށް އަރަމުންދާ "މަންތްލީ ރެންޓަރ" ފައިސާއާއި ޗެރިޓީގެ ގޮތުގައި އަރަމުންދާ ފައިސާ އެއްފަހަރާ ހޯދުމަށެވެ. އަދި އެ ފައިސާ އެއްފަހަރާ ނުދެއްކޭނަމަ އެ ފެސިލިޓީއާއި ގުޅިގެން ރަހުނުކޮށްފައިވާ ޕްލެޓިނަމް ރެސިޑަންސް ސީ1-ސީ2 ގައިވާ ސީ2-3/5 ނަންބަރު ފުލެޓް ވިއްކާލުމުގެ ހައްގު ދިނުމަށް އެދިފައިވެއެވެ.

އަދި މި ފުލެޓަކީ ނިހާން ނަގާފައިވާ ފެސިލިޓީގެ ރަހުނުގެ ގޮތުގައި ބަހައްޓާފައިވާ ތަން ކަމަށާއި، އެތަނުގެ ހައްގުތަކާއި ބާރުތައް ބާތިލްނުވެ ދެމިގެންދާނެކަމަށް ކަނޑައަޅައިދިނުމަށް އެމްއައިބީ އިން ވަނީ ކޯޓުގައި އެދިފައެވެ.

އަދި ނިހާނަށް ދިފާއު ހުށަހެޅުމަށް ދީފައިވާ މުއްދަތުގައި ދިފާއު ހުށަހަޅާފައި ނުވުމުން، ޣައިރު ހާޒިރުގައި ހުކުމްކޮށްދިނުމަށް ވެސް އެދިފައިވެއެވެ. މި މައްސަލާގައި ކޯޓުގެ ޗިޓާއި ހަވާލުވި ނަމަވެސް ނިހާން ކޯޓަށް ހާޒިރުވެފައި ނުވާތީ މައްސަލާގައި ހުކުމްކޮށްފައި ވަނީ ނިހާނުގެ ޣައިރު ހާޒިރުގައެވެ.

މި މައްސަލައިގެ ހުކުމުގައި ބުނެފައިވަނީ 11 އޮކްޓޯބަރުގެ ނިޔަލަށް ދައްކަން ޖެހި ނުދައްކާ ހުރި 3،874،412.24 ރުފިޔާއާއި، ޗެރިޓީގެ ގޮތުގައި 152،560.04 ރުފިޔާ އަކީ އެމްއައިބީއަށް ނިހާން އަދި އިނާން ހުސައިން މަނިކު ދައްކަން ޖެހޭ ފައިސާކަން ސާބިތުވާކަމަށް ކަނޑައަޅާ ކަމަށެވެ. އަދި މި ފައިސާ 12 އޮކްޓޯބަރުން ފެށިގެން 6 މަސް ދުވަސްތެރޭގައި ދައްކާ ހަލާސްކުރުމަށް ވަނީ އަންގާފައެވެ.

އަދި މި ލޯނާއި ގުޅިގެން ރަހުނު ކުރި ފުލެޓް އިސްލާމިކް ބޭންކުގެ ބާރުގެ ދަށަށް ގެނެސް ފައިސާ ނުދައްކައިފިނަމަ ރަހުނު ވިއްކާލުމުގެ ކަންތައްތައް އުސޫލާ އެއްގޮތަށް ކުރިއަށް ގެންދިއުމުގެ ހައްގު އެމްއައިބީއަށް ލިބިގެންވާކަމަށް ވަނީ ހުކުމްކޮށްފައެވެ.