މިނިވަން ޗެމްޕިއަންޝިޕްގައި ގދ.ތިނަދޫ ރޮއްވާލުމަށްފަހު، މުހައްމަދު ޝިޔާޒް (މޯހަން) ގޮވައިގެން އައި ދ.ކުޑަހުވަދޫ އިން މުބާރާތުގެ ޗެމްޕިއަންކަން ހޯދައިފި އެވެ.

ހުކުރު ދުވަހުގެ ރޭ ކުޅުނު ފައިނަލް މެޗު ތިނަދޫއާ ވާދަކޮށް ކުޑަހުވަދޫ އިން ކާމިޔާބުކުރީ 0-2 ގެ ނަތީޖާއަކުންނެވެ.

ގައުމީ ފުޓުބޯޅަ ސްޓޭޑިއަމްގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ކުޑަހުވަދޫ އެވެ. އެގޮތުން އެޓީމުން ވަނީ ތިނަދޫގެ ހާފަށް ބާރުބޮޑުކޮށް ފުލުފުލުގައި ގިނަ ހަމަލާތަކެއް ފޮނުވާލާފައެވެ.

ކުޑަހުވަދޫ އިން މެޗުގެ ލީޑު ނެގީ 19 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އިރްފާން އާދަމް ނަސީރެވެ. މި ލަނޑަށްފަހުވެސް އެޓީމަށް ވަނީ ލީޑު އިތުރަށް ފުޅާކުރަން ހުސް ގިނަ ފުރުސަތުތައް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ތިނަދޫގެ މައްޗަށް ކުޑަހުވަދޫ ކުރީގައި އޮވެގެންނެވެ.

ދެވަނަ ހާފް ފެށިގެން ތިނަދޫއިން އެޓީމުގެ ކުޅުން ރަނގަޅުކުރި އެވެ. އެހެންނަމަވެސް އެޓީމަށް މާ ރަނގަޅު ހަމަލާތަކެއް އުފެއްދޭގޮތް ވަނީ ނުވެފައެވެ. އެއާ ހިލާފަށް ކުޑަހުވަދޫއިން ވަނީ އެޓީމުގެ މޮޅު ކުޅުން ދެވަނަ ހާފްގައިވެސް ތަކުރާރުކޮށް ލަނޑު ޖެހުމަށް ފުރުސަތުތައް ފުލުފުލުގައި ތަނަވަސްކޮށްފައެވެ.

ކުޑަހުވަދޫ އިން މެޗުގެ ލީޑު ފުޅާކުރީ 79 ވަނަ މިނެޓުގައި އެޓީމުގެ ބިދޭސީ ކުޅުންތެރިޔާ އަފޯނިއާ ޖިބޯލާ ކާމިޔާބުކުރި ލަނޑުންނެވެ. މެޗުގައި އޭނާ ވަނީ މޮޅު ކުޅުމެއް ދައްކާފައެވެ.

ޖުމްލަ 81 ޓީމު ވާދަކުރި މި މުބާރާތުގެ ޗެމްޕިއަންކަން ކުޑަހުވަދޫ ހޯދާފައިވާއިރު، އެޓީމު ވަނީ ދިވެހި ޕްރިމިއާ ލީގުންވެސް ޖާގައެއް ކަށަވަރުކޮށްފައެވެ. މީގެއިތުރުން ތިނަދޫ އަށްވެސް ޕްރިމިއާ ލީގުން ޖާގައެއް ލިބޭނެއެވެ.

ކުޑަހުވަދޫ ގޮވައިގެން މިނިވަން ޗެމްޕިއަންޝިޕަށް ނިކުތީ ނުއުރޭޑިންޓް ސްޕޯޓްސް ކްލަބްގެ ކުރީގެ ކޯޗު މޯހަން އެވެ. އޭނާ ޓީމެއް ގޮވައިގެން ގައިމީ ސްޓޭޑިއަމް އަށް ނިކުތީ ގިނަ އަހަރުތަކަށްފަހު އެވެ.

މިފަހަރުގެ ލީގް ފޯމެޓަށް އަލަށް ގެނައި ބަދަލާއެކު މިނިވަން ޗެމްޕިއަންޝިޕްގެ ގަދަ ހަތަރު ޓީމަށް ޕްރިމިއާ ލީގުން ޖާގަ ލިބެއެވެ. އެ ހަތަރު ޓީމު ވާދަކުރަންޖެހޭނީ ޕްރިމިއާ ލީގުގައި މާލޭ ލީގުގެ ގަދަ ހަތަރެއްގައި ހިމެނުނު ޓީމުތަކާއެވެ.