ރައީސް އިބްރާހިމް މުޙައްމަދު ޞާލިޙުގެ ލެގަސީ މިރާއްޖޭގެ ކުރިއަށް އޮތް މުސްތަޤުބަލުގައި އަބަދުވެސް އާވެއާވެ ހުންނާނެކަމަށް ޔޫތު މިނިސްޓަރ އަހުމަދު މަހުލޫފު ވިދާޅުވެއްޖެއެވެ.

ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން މަހުލޫފު ވިދާޅުވީ، އެމްޑީޕީން އެންމެ އަވަހަށް ތައްޔާރުވާނީ ކުރިއަށް އޮތް މަޖިލިސް އިންތިޚާބަށް ކަމަށެވެ. އެއީ ސިޔާސީ ގޮތުން ދެން އެމްޑީޕީން އަޅާނެ އެންމެ ބޮޑު ފިޔަވަޅުގެ ގޮތުގައި މަހުލޫފު ސިފަ ކުރެއްވިއެވެ.

މަހުލޫފު ވިދާޅުވީ، މިހާރުން ފެށިގެން މަޖިލިސް އިންތިޚާބަށް ތައްޔާރުވެގެން ނުކުންނަންޖެހޭކަމަށެވެ.

މަހުލޫފު ވިދާޅުވީ، ރައީސް ޞާލިޙު ކޮށްދެއްވި ޚިދުމަތްތައް ރައްޔިތުންނަށް އަގުވަޒަން ކުރެވޭނެކަމަށެވެ.

ޤާނޫނުއަސާސީން ރައްޔިތުންނަށް ލިބިދޭ ޙައްޤުތައް އެންމެ ފުރިހަމަކަމާއެކު ބޭނުން ކުރުމުގެ ފުރުސަތުދެއްވީވެސް ރައީސް ޞާލިޙުގެ ވެރިކަމުގައިކަން މަހުލޫފު ފާހަގަ ކުރެއްވިއެވެ.

މަހުލޫފު އިތުރަށް ވިދާޅުވީ، ރައީސް ޞާލިޙު ފައްޓަވާފައިވާ ތަރައްޤީގެ މަޝްރޫއުތައް ދެން އަންނަ ސަރުކާރުތަކުގައިވެސް ހުއްޓުމެއްނެތި ކުރިއަށް ގެންދާނެކަމަށް އުއްމީދު ކުރައްވާ ކަމަށާއި، ރައީސް ޞާލިޙުގެ "ލެގަސީ" އެތައް ޒަމާނަކަށް ދެމިގެންދާނެކަމަށެވެ.

ހަމައެކަނި ކުޅިވަރުގެ ދާއިރާއަށް ބަލާލިނަމަވެސް، އެއްވެސް ސަރުކާރަކުން ގެނެސްފައިނުވާ މިންވަރަށް މި ސަރުކާރުން ތަރައްޤީ ގެނެސްދީފައިވާކަން މަހުލޫފުގެ ވާހަކައިގައި ފާހަގަ ކުރެއްވިއެވެ.