ފްރާންސްގެ ކެޕްޓަން ކީލިއަމް އެމްބާޕޭ މިހާރު ހުރި ފޯމާމެދު ކުޅުންތެރިޔާ ދެރަވާނެކަމަށް ގައުމީ ކޯޗު ޑިޑިއޭ ޑެޝޯން ބުނެފި އެވެ.
އޭނާ މިހެން ބުނީ ވޯލްޑްކަޕް ކޮލިފައިން އަށް ތައްޔާރުވާން ނެގި ސްކޮޑާ ބެހޭގޮތުން ވާހަކަ ދައްކަމުންނެވެ. މި ސްކޮޑުގައި އެމްބާޕޭ ހިމެނުނަސް ޑެޝޯން ބުނީ އެންމެ ފަހުގެ ވޯލްޑްކަޕުގެ ރަންބޫޓު ހޯދި ފޯވަޑް ހުރީ ވަރަށް ދަށް ފޯމެއް ކަމަށެވެ.
މި ސީޒަން ފެށުމުގެ ކުރިން ރެއާލް މެޑްރިޑަށް ބަދަލުވާން ކުރި މަސައްކަތާއެކު ވެސް ކޮންޓްރެކްޓް ނިމެންދެން ޕީއެސްޖީގައި ހުންނަން އެމްޕާބޭ އަށް ވަނީ މަޖުބޫރުވެފަ އެވެ. ނަމަވެސް އޭނާގެ ފުށުން އެކަށީގެންވާ ވަރާ ގާތަށް ވެސް މޮޅު ކުޅުމާއި ލަނޑު ޖެހުމެއް ނުފެނެ އެވެ.
"އޭނާ އެހުރީ އޭނާގެ އެންމެ މޮޅު ފޯމަކުނޫން. އޭނާގެ ކުލަބުގެ ނަތީޖާތަކަށް ބަލާއިރު އެކަން އެނގޭ. އެކަމަކު އޭނާ އަކީ ނަތީޖާ ބަދަލުކޮށްލުމުގެ ގާބިލްކަން ހުރި ކުޅުންތެރިއެއް. އެއީ އޭނާ ހުރުމުން ޓީމަށް ލިބޭނެ އިތުބާރެއް،"ޑެޝޯން ބުންޏެވެ.
ގައުމީ ޓީމުގައި ފާއިތުވެދިޔަ އަށް އަހަރު އެމްބާޕޭ އަށް ކޯޗުކޮށްދިން ޑެޝޯން ބުނީ މިއީ އެމްބާޕޭ ފޯމު ގެއްލުނު ފުރަތަމަ ފަހަރު ނޫން ކަމަށާއި މިހެންވެ އަލުން އޭނާ ފޯމަކަށް އަންނާނެ ކަމާމެދު ކަންބޮޑުނުވާ ކަމަށެވެ. އަދި އެމްބާޕޭެ ފޯމު ދަށްވި ސަބަބެއް ކަމަށް ގަބޫލުކުރެވެނީ ކުލަބާ މައްސަލަޖެހި، ހިނގި ކަންތައްތަކުގެ ތެރޭގައި ޕްރީ ސީޒަން ރަނގަޅަށް ނުދިއުން ކަމަށެވެ.
"އަހަރެން އޭނާ ވަރަށް ރަނގަޅަށް ދަންނަން. މިއީ އޭނާ ދަށްކޮށް ފެނިގެންދާ ފުރަތަމަ ފަހަރެއްނޫން. އޭނާ ފޯމަކަށް އަންނާނެ. ރަނގަޅު ހާލަތެއްގައި ހުރިނަމަ އޭނާ އަކީ ވަރަށް މޮޅު ކުޅުންތެރިއެއް,"ޑެޝޯން ބުންޏެވެ.
މި ސީޒަން ފެށުނުއިރު ޕްރީ ސީޒަންތެރޭގައި އެމްބާޕޭ ޕްރެކްޓިސް ކުރީ އެކަނިމާއެކަނި އަދި ބައެއް ފަހަރު ޕީއެސްޖީގެ ޒުވާން ކުދިންނާއެކުގަ އެވެ. އެއީ ރެއާލް މެޑްރިޑަށް ބަދަލުވާން ގަދަ ދެއްކުމުން ދިން އަދަބެއްގެ ގޮތުގަ އެވެ.
