ރިޔާސީ އިންތިޚާބުގެ ދެވަނަ ބުރުގައި ބާތިލް ވޯޓު ވަރަށް ގިނަ ކަމަށާއި، ސަބަބުތައް ދެނެގަނެ މިމައްސަލަ ހައްލު ކުރުމަށް އެކަށީގެންވާ މަސައްކަތްތަކެއް ކުރަންޖެހޭ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ބުނެފިއެވެ.

އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއާރްސީއެމްގެ މެންބަރު އާމިނަތު ޝިފާއަތު އަބްދުއްރައްޒާގް ވިދާޅުވީ ރިޔާސީ އިންތިޚާބުގައި ވޯޓުލީ މީހުންގެ ތެރެއިން ތިން އިންސައްތަ މީހުންގެ ވޯޓަކީ ބާތިލް ވޯޓު ކަމަށާއި، ފުރަތަމަ ބުރުގައި ވޯޓުލީ މީހުންގެ ތެރެއިން ވެސް ދެ އިންސައްތަ މީހުންގެ ވޯޓު ގުނިގެން ދިޔައީ ބާތިލް ވޯޓުގެ ގޮތުގައި ކަމަށެވެ. މިއީ ކަންބޮޑުވާ މައްސަލައެއް ކަމަށާއި، މިކަމުގައި ގިނަ ސަބަބުތަކެއްވާނެ ކަމަށާއި، އެސަބަބުތައް ދެނެގަންނަންޖެހޭ ކަމަށް ޝިފާއަތު ވިދާޅުވިއެވެ.

ޝިފާއަތު ވިދާޅުވީ އިންތިޚާބުގެ ފުރަތަމަ ބުރުގައި ވެސް ގިނަ އަދަދެއްގެ ވޯޓު ބާތިލްވުމާއި ގުޅިގެން އެމައްސަލަ ސަމާލުކަމަށް ގެނެސް، އާއްމު ރައްޔިތުން ހޭލުންތެރިކުރުވުމަށް ގިނަ މަސައްކަތްތަކެއް ކުރެވުނު ކަމަށެވެ. ނަމަވެސް ދެވަނަ ބުރުގައި ވެސް ބާތިލް ވޯޓު ގިނަވުމުން އިތުރަށް މަސައްކަތް ކުރަންޖެހޭ ފާހަގަވާ ކަމަށް އޭނާ ވިދާޅުވިއެވެ.

ސަބަބުތަކަށް އިޝާރާތް ކުރައްވައި ޝިފާއަތު ވިދާޅުވީ ވޯޓާ ވަރަށް ކައިރިވެފައިވަނިކޮށް ސައްހަ ވޯޓާއި ބާތިލް ވޯޓު ގުނުމުގައި ބަދަލުތަކެއް ގެނައުމާއި، ދައުލަތުގެ ހިންގުން ނިޒާމީ ގޮތެއްގައި ބައްޓަން ކުރެވިފައިވާ ގޮތާއި, އެ ނިޒާމުގެ ތެރެއިން ލިބިދޭ ޚިދުމަތްތަތަކާއި, ރައްކާތެރިކަމާއި, ހައްލުތަކަކީ އެންމެ އެކަށީގެންވާގޮތަށް އަދި އެންމެ ޒިންމާކުރުވަނިވި ގޮތެއްގައި ހިނގަމުންދާ ކަންކަންކަމުގައި ގަބޫލު ނުކުރެވުން ނުވަތަ އެކަމަށް އިތުބާރު ނުކުރެވުން ހިމެނޭ ކަމަށެވެ.

ޝިފާއަތު ވިދާޅުވީ ކުރިއަށް އޮތްތަނުގައި ވެސް ވަރަށް ކައިރީގައި އިންތިޚާބުތަކެއް ރާއްޖޭގައި ބޭއްވިގެންދާނެ ކަމަށެވެ. އެހެންކަމުން އެ އިންތިޚާބުގައި މި މައްސަލަތައް ދިމާނުވާފަދަ ގޮތަކަށް އާއްމު ރައްޔިތުން ހޭލުންތެރިކުރަންޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ ސަރުކާރުގެ އިދާރާތަކާއި، މިނިވަން މުއައްސަސާތަކާއި، މަދަނީ ޖަމިއްޔާޖަމާއަތްތަކުންނާއި، ސިޔާސީ ޕާޓީތަކުން އަދި މިނިވަން މުއައްސަސާތަކުން މި މައްސަލައަށް ހައްލު ހޯދުމުގައި މަސައްކަތް ކުރަންޖެހޭ ކަމަށެވެ.