މަޑަގަސްކަރާގައި އާދިއްތަ ދުވަހު ނިމޭ 11 ވަނަ އިންޑިޔަން އޯޝަން އައިލެންޑް ގޭމްސްގައި ބެޑްމިންޓަން ޓީމަށް ހޯދުނީ އެއް ރަން މެޑެއްޔެވެ. 2019 ވަނަ އަހަރު އޮތް އިންޑިޔަން އޯޝަން އައިލެންޑް ގޭމްސްގައިވެސް ރާއްޖޭގެ ބެޑްމިންޓަން ޓީމުން ރަން މެޑެއްޔެއް ހޯދިއެވެ. 2019 ވަނަ އަހަރު ހޯދީ އަންހެން ސިންގަލްސްގައި ނަބާ ހޯދައިދިން ގޯލްޑް މެޑެއްޔެވެ. އެކަމަކު މިފަހަރު ހޯދީ އަންހެން ޑަބަލްސްގެ ރަން މެޑެއްޔެވެ. ނަބާއާއި ނަބީ ހޯދައިދިން މެޑެއްޔަކީ އިންޑިޔަން އޯޝަން އައިލެންޑް ގޭމްސްގެ ޑަބަލްސްގައި ބެޑްމިންޓަން ޓީމުން ހޯދި ފުރަތަމަ ރަން މެޑެއްޔެވެ. އެކަމަކު ސިންގަލްސް މެޑަލް ދިފާއުނުކުރެވުމުގެ މާޔޫސްކަން އެބައޮތެވެ.

އެއް ރަން މެޑެއްޔާއެކު ޓީމްގެ ޖުމްލަ އަދަދަކީ މިފަހަރު ހަތް މެޑެއްޔެވެ. އެއީ ތިން ރިހި މެޑެއްޔާއި ތިން ލޯ މެޑަލް ހިމެނޭ ގޮތަށެވެ. ރިހި މެޑަލް ހޯދީ އަންހެން އަދި ފިރިހެން ޓީމް, ޓީމް އިވެންޓުންނާއި އަންހެން ސިންގަލްސްގައި ނަބާއެވެ. ލޯ މެޑަލް ހޯދީ ފިރިހެން ސިންގަލްސްގައި އަހުމަދު ނިބާލްއާއި މިކްސް ޑަބަލްސްގައި ނަބާއާއި ޒަޔާން އަދި އަންހެން ސިންގަލްސްގައި ނަބީއެވެ.

2019 ވަނަ އަހަރުގެ ގޭމްސްގައި ރާއްޖޭގެ ބެޑްމިންޓަން ޓީމްގެ ޖުމްލަ އަދަދަކީ 5 މެޑެއްޔެވެ. އެހެންކަމުން ޖުމްލަ އަދަދުން ކުރިއަރުން ހޯދައިފިއެވެ. އަދި ޖުމްލަ ނަތީޖާއިންވެސް ކުރި ހޯދައިފިއެވެ. އެ ހިތްހަމަޖެހުން އޮތަސް ރަން މެޑަލް ހޯދެން އޮތް އިވެންޓްތަކެއް ގެއްލިގެން ދިއުމުގެ މާޔޫސްކަންވެސް އެބައޮތެވެ.

ބެޑްމިންޓަން ޓީމްގައި މިގޭމްސްގެ ރާއްޖޭގެ އެންމެ ކާމިޔާބު އެތްލީޓަކީ ނަބާއެވެ. އެއް ރަން މެޑެއްޔާއި ދެ ރިހި މެޑައްޔާއެކު ނަބާ ހަތަރު މެޑަލް ހޯދިއެވެ. ޑަބަލްސް މެޗަށްފަހު ނަބާ ބުނީ އައިއޯއައިޖީއަށް އައިއިރުވެސް ޑަބަލްސްއިން ގޯލްޑް ނެގޭނެކަމުގެ ވަރަށްބޮޑު އިތުބާރެއް ދެބެންނަށް އޮތް ކަމަށެވެ. ކޯޗާއެކު އެކަމަށް ވަރަށްބޮޑަށް މަސައްކަތްވެސް ކުރި ކަމަށާއި ކުރިން ނުނެގުނު ޑަބަލްސް މެޑަލް ލިބުމުން ވަރަށްބޮޑު އުފަލެއް ލިބިއްޖެކަމަށެވެ.

އޯޕަންސް ފިރިހެން ސިންގަލްސްގައި މޮރިޝަސް ކުޅުންތެރިންގެ އިތުރުން ސްޓޭޖް ހިއްސާކުރި ހަމައެކަނި ކުޅުންތެރިޔާ ނިބާލް ބުނީ ރަން މެޑަލް ނުލިބުމުގެ މާޔޫސްކަން އޮތަސް ޖުމްލަ ނަތީޖާއާ މެދު ހިތްހަމަޖެހޭކަމަށެވެ. އަދި މިފަހަރުގެ ނަތީޖާ މިއަށްވުރެ ރަނގަޅު ކުރެވޭނެކަމަށެވެ. ނަބާއާއެކު ހޯދި މިކްސް ޑަބަލްސް މެޑެއްޔާއެކު ގޭމްސްގައި ދެ މެޑަލް ހޯދި ޒަޔާންވެސް ބުނީ ހަމައެކަނި މާޔޫސްކަމަކީ ރަން މެޑަލް ގެއްލުން ކަމަށާއި ހުރި އުނދަގޫތަކާއެކުވެސް ޖުމްލަކޮށް ހިތްހަމަޖެހޭކަމަށެވެ. ތިން ކުލައިގެ ތިން މެޑައްޔާއެކު ބެޑްމިންޓަން ޓީމްގައި ދެން އެންމެ ކާމިޔާބު ކުޅުންތެރިއަކީ ނަބީއެވެ. ނަބީ ބުނީ ގޭމްސްއަށް އައީ ޑަބަލްސް މެޑަލްގެ ވަރަށް ބޮޑު ޔަޤީންކަމަކާއެކު ކަމަށެވެ.

ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު ވިދާޅުވީ މުޅި ގޭމްސްއަށް ބަލާއިރު ތިނެއް ނޫނީ ހަތަރު ރަން މެޑަލް ހޯދުމުގެ ފުރުޞަތު ލިބި ގެއްލުނު ކަމަށެވެ. އެހެންނަމަވެސް މެޗެއްގައި ކަންކަން ދިމާވާނީ އެކިފަހަރު އެކިގޮތަށް ކަމަށާއި, ކަންދިމާވިގޮތުން އެކަހަލަ ބައެއް ފުރުޞަތުތައް ފުރޮޅާނުލެވިގެން އެންމެ ރަން މެޑެއްޔަކުން ފުއްދާލަން ޖެހުނީ ކަމަށެވެ. އެކަމަކު މޫސައަށްވެސް އޮތް ހިތްހަމަޖެހުމަކީ އުއްމީދުކުރިވަރަށްވުރެ ޓީމުން ހޯދި މެޑަލްގެ އަދަދު އިތުރުވުމެވެ.

މިފަހަރުގެ އިންޑިޔަން އޯޝަން އައިލެންޑް ގޭމްސްގައި ބެޑްމިންޓަން ވެފައިވަނީ ދެވަނަ އަށް އެންމެ ގިނަ މެޑަލް ރާއްޖެއަށް ހޯދައިދިން ކުޅިވަރަށެވެ. އެއީ ހަތް މެޑެއްޔާއެކުއެވެ. އެންމެ ގިނަ މެޑަލް ހޯދައިދިން ޓޭބަލް ޓެނިހުގެ ޖުމްލައަކީ ނުވައެކެވެ.