މިސަރުކާރުން މަސައްކަތް ކުރަނީ އަންހެނުން ސިޔާސީ ދާއިރާއަށް ބާރުވެރިކުރުވުމަށް ކަމަށާއި، ނަމަވެސް ޕީއެންސީގެ ރިޔާސީ ކެންޑިޑޭޓު ޑރ.މުހައްމަދު މުއިއްޒުގެ ކެމްޕޭންގައި ވެސް އަންހެނުން ޖަލަށްލާނެ ކަމަށް ވިދާޅުވެ ދައްކަވަނީ ބިރު ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރިޔާސީ ކެމްޕޭނުގެ ތަރުޖަމާނު މާރިޔާ އަހުމަދު ދީދީ ވިދާޅުވެއްޖެއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މާރިޔާ ވިދާޅުވީ އަންހެނުން ސިޔާސީ ދާއިރާއަށް ނެރެ، އަންހެނުން ބާރުވެރިކުރުވުމަށް މިސަރުކާރުން ޚާއްސަ އިސްކަމެއްދީގެން ގިނަގުނަ މަސައްކަތްތައް ކުރެވިފައިވާ ކަމަށާއި، ކުރިއަށް އޮތްތަނުގައި ވެސް ކުރާނެ ކަމަށެވެ.

މާރިޔާ ވިދާޅުވީ އަންހެނުން ބާރުވެރިކުރުވުމަކީ ރައީސް އިބްރާހިމް މުހައްމަދު ސާލިހުގެ ވައުދުފުޅެއް ކަމަށެވެ. ނަމަވެސް ޕީއެންސީގެ ރިޔާސީ ކެންޑިޑޭޓު މުއިއްޒު މަސައްކަތް ކުރައްވަނީ ބިރުދައްކެވުމަށް ކަމަށާއި ދައްކަވަނީ އަންހެނުން ހައްޔަރުކުރާ ވާހަކަ ކަމަށެވެ.

މީގެ އިތުރުން މާރިޔާ ވިދާޅުވީ މާލެސިޓީ ކައުންސިލްގެ ޑަބްލިޔުޑީސީގެ ބައްދަލުވުމެއް ކުރިއަށް ތަޅުއަޅުވައި އެތެރޭގައި ބަންދުކުރި ކަމަށެވެ. މިއަމަލުގެ ސަބަަބުން ވެސް މޭޔަރު މުއިއްޒު އަންހެނުންނަށްގެ މަސައްކަތްތަކަށް ބަލާމިންވަރު ހާމަވެގެންދާ ކަމަށް މާރިޔާ ވިދާޅުވިއެވެ.

މާރިޔާ ވިދާޅުވީ މިހާރު ވެސް މަލަމަތި އޮތީ ފެންނަން ކަމަށާއި، ކުރިއަށް އޮތް އިންތީޚާބުގައި ރައްޔިތުން ވޯޓުލާއިރު ވިސްނަންޖެހޭ ކަމަށެވެ. އަދި އަނިޔާވެރިކަމަށް ނޫނެކޭ ބުނަންޖެހޭ ކަމަށް މާރިޔާ ވިދާޅުވިއެވެ.