ލ. މާމެންދޫގެ ރައްޔިތުން އެދޭ ގޮތަށް، ދެވަނަ ދައުރެއްގައި އެ ރަށުގެ ބިން ހިއްކައި ރޯހައުސް އަޅުއްވައިދެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވައުދުވެވަޑައިގެންފިއެވެ.

"އުފާވެރި އަމާން ރާއްޖެ" ކެމްޕޭނަށް އަންގާރަ ދުވަހު މާމެންދުއަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ރައީސް ވިދާޅުވީ، އެމަނިކުފާނުގެ ދެވަނަ ދައުރެއްގައި ވެސް އެ ރަށަށް ގިނަ ކަންކަން ކޮށްދެއްވުމަށް ނިންމަވާފައި ވާކަމަށެވެ. އެގޮތުން، ރާއްޖޭގެ ރަށްތައް ތަރައްގީ ކުރުމަށް މިހާރު އަޅާފައިވާ ބިންގަލުގެ މަތީގައި، ރައްޔިތުންނަށް އުފާވެރި، އަމާން މުޖުތަމައެއް ގެނެސްދެއްވުމަކީ އުއްމީދެއްކަމަށާއި، އެމަނިކުފާނުގެ މެނިފެސްޓޯގައިވާ ކަންކަން ކޮށް ނިމޭއިރު ރާއްޖެއަށް ބޮޑު ބަދަލެއް އަންނާނެ ކަމަށްވެސް ވިދާޅުވިއެވެ.

ރައީސް ވިދާޅުވީ ބިމުގެ ދަތިކަމާއި ބޯހިޔާވަހިކަމުގެ ދަތިކަމުގެ މައްސަލައަކީ މާމެންދޫ ރައްޔިތުންގެ ވަރަށް ބޮޑު ކަންބޮޑުވުމެއް ކަމަށާއި، އެކަން އެމަނިކުފާނުގެ ދެވަނަ ދައުރެއްގައި ހައްލު ކޮށްދެއްވާނެ ކަމަށެވެ. އަދި ބިން ހިއްކުމުގެ މަސައްކަތް ކުރާއިރު އެ ރަށުގައި މޫދަށް އެރޭނެ ސަރަހައްދެއް ހައްދަވައިދެއްވައި، ޒުވާނުން ބޭނުންވާ އިންޑޯ ބެޑްމިންޓަން ކޯޓާއި އިޖުތިމާއީ މަރުކަޒު އަޅުއްވައިދެއްވައި، އެ ރަށުގެ ސިއްހީ މަރުކަޒު 24 ގަޑިއިރަށް ޚިދުމަތްދޭ ތަނަކަށް ބަދަލުކޮށްދެއްވާނެ ކަމަށްވެސް އެމަނިކުފާނު ވިދާޅުވިއެވެ.

ވިއްސާރަވާއިރު ރަށްރަށުގެ މަގުތަކުގައި ފެންބޮޑުވާކަން ފާހަގަކުރައްވައި ރައީސް ވިދާޅުވީ، އެމަނިކުފާނުގެ ދެވަނަ ދައުރެއްގައި ރަށްރަށުގައި ހިންގާ އެންމެ ބޮޑު މަޝްރޫއަކަށް ވެގެންދާނީ މަގުތައް ޒަމާނީ ފެންވަރަށް ތަރައްގީކުރުމުގެ މަސައްކަތް ކަމަށެވެ. މި މަސައްކަތުގެ ދަށުން މާމެންދޫގެ ބޮޑެތި މަގުތަކުގައި ތާރު އަޅައި ތަރައްގީ ކުރައްވާނެ ކަމަށްވެސް ވިދާޅުވިއެވެ.

ކުރީގެ ސަރުކާރުތަކުން މަސްވެރިކަމުގެ ދާއިރާއަށް އިހުމާލުވެފައިވާކަން ފާހަގަކުރައްވައި ރައީސް ވިދާޅުވީ، އެ ސިނާއަތް ކުރިއެރުވުމަށް މިހާރުވެސް މަސައްކަތް ކުރަމުން އަންނައިރު، އަދިވެސް ކުރަންޖެހޭ ގިނަ ކަންކަން ހުރިކަމަށެވެ. މި ސަރުކާރުގެ ވިސްނުމަކީ ވަގުތީ ހައްލަކަށްވުރެ ދާއިމީ ހައްލެއް ހޯދައިދިނުން ކަމަށާއި، އަހަރެއް ނުވަތަ ދޮޅު އަހަރު ތެރޭގައި އެ ސިނާއަތަށް ބޮޑު ބަދަލެއް އަންނާނެކަން އެމަނިކުފާނު ފާހަގަކުރެއްވިއެވެ.