"އުފާވެެރި އަމާންރާއްޖެ"ކެމްޕޭނަށް ރ. މަޑުއްވަރީއަށް ފުރާ ވަޑައިގަތުމުން، ކަނޑުމަތިން ރައީސްއަށް ތަފާތު މަރުހަބާއެއް ދަންނަވައިފިއެވެ.
ރ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ރ. މީދޫއަށް ފަހު ދެން ދަތުރުފުޅު ފެއްޓެވީ މަޑުއްވަރީއަށެވެ. އެމަނިކުފާނު މަޑުއްވަރީއަށް ވަޑައިގެންނެވި މަގުމަތީގައި ކަނޑުމަތިން މަޑުއްވަރީގެ ގިނަ އަދަދެއްގެ ޒުވާނުން ވަނީ ކަނޑުމައްޗަށް ނުކުމެ ޕެރޭޑެއް ގޮތަށް ރައީސަށް މަރުހަބާ ދަންނަވާފައެވެ.
އެގޮތުން ކުދި ޑިންގީތަކާއި ލޯންޗް ތަކުގައި އެމްޑީޕީގެ ދިދައާއި، އުފާވެރި އަމާންރާއްޖެ ލޯގޯ ޖަހާފައިވާ ދިދަތައް ޖަހައިގެން ވީ ޝޭޕަށް ރައީސްގެ ލޯންޗް ކޮޅުގެ ފަހަތުން ދުއްވާފައިވެއެވެ. މި ޕެރޭޑުގައި ވިއްސަކަށް އުޅަނދު ބައިވެރިވިއެވެ.
ރައީސްގެ ލޯންޗުކޮޅު މަޑުއްވަރީ ބަނދަރަށް ވަންނަންދެން އެ ލޯންޗްތަކާއި ޑިންގީތަކުގައި ދިޔައީ ލަވަޖަހާ އެމަނިކުފާނަށް މަރުހަބާ ދަންނަވަމުންނެވެ.
މި ހަރަކާތަކީ މިހާތަނަށް ރައީސްގެ ކެމްޕޭންގެ ތެރެއިން ފެނުނު ތަފާތު ހަރަކާތެވެ. އަދި އެމަނިކުފާނު މަޑުއްވަރީއަށް ވަޑައިގެންނެވި އިރު އެެރަށުން ވެސް ވަނީ ވަރަށް ހޫނު މަރުހަބާއެއް ދަންނަވާފައެވެ.
